________________
. ६३२
सिरिअणंतजिणचरियं पत्ता वि पलइ च्चिय अपुन्नवंताण निच्छियं लच्छी । किमभग्गगिहल्लीणा होइ थिरा कामदुहधेणू ॥ ८११४ ॥ सुकुमालतणू पेम्मेक्कमंदिरं विमलसीलकलियंगी । कह सहिही मह कंता कयत्थणं रायभडजणियं ॥ ८११५ ॥ नूणं न मए रम्मो धम्मो विहिओ भवम्मि पुव्विल्ले । जमहं विडबणाडंबरं इमं इह भवे पत्तो ॥ ८११६ ॥ तत्थ गमणुस्सुओ वि हु गच्छामि कहं उवायहीणो हं । कहमक्कमचंकमणो पंगू वंछियपुरं जाइ || ८११७ । जइ जामि तत्थ लच्छि ता निवघत्थं पि नूण वालेमि । गुरुविसवेगविलुत्तं पि चेयणं मंतवाइ व्व ॥ ८११८ ॥ इय तस्स धणविणासा सुहियस्स निसा ठिया पहरसेसा । पुत्ताण गमणठाणाणि कहिय गच्छंति भारुंडा ॥ ८११९ ॥ जो चलिओ तन्नयरे पाए सो तस्स दढयरं लग्गो । उड्डीणो भारुंडो मणनयणजवेण जाइ नहे || ८१२० ॥ नवरं सो विहिविलसियवसेण विलुड्डिऊण तप्पाया । पडिओ समुद्दसलिले विमुहविही कुणइ नो किं वा ? || ८१२१ ॥ मज्जंतेणं तेणं जिणगुरुचरणाण सुमरियं सहसा । तस्साणुभावओ मरियमच्चुए सो सुरो जाओ ॥ ८१२२ ॥ कालेण चारणस्समणतग्गुरु तम्मि चेव कप्पम्मि । जाओ सुरो तहा पुव्वभवभवो ताण नेहो वि ॥ ८१२३ ॥ नाऊणं नियचवणं तेणुत्तो गुरुसुरो सुही एवं ।। पत्ते मणुयत्ते में पडिबोहेज्जसु तुमं मित्त ! || ८१२४ ॥ पडिवन्नं तेण तयं सो चविऊणमेत्थ वेयड्ढे । खयरिंदसुओ जाओ चलिओ य पकीलिओ एत्थ ॥ ८१२५ ॥ एत्थंतरे मए सुरसुहसंगविमोहओ बहुदिणेहिं । सरिया पुव्वभवदुगपडिबोहब्भत्थणा तुज्झ ॥ ८१२६ ॥
Jain Education International
For Private & Personal Use Only
www.jainelibrary.org
