________________
३७
गिहिधम्मे चंदसेणकहा (पट्टहत्थिपलायणं) अवरावसरम्मि निवे सहागए ससुयमंतिमंडलिए । नरनाहपट्टहत्थी भग्गालाणो विणिक्खंतो ॥ ४४१ ॥ सुन्नासणो अघंटो निरंकुसो पसरिओ करी तुरियं । करुडु व रडंतकरहे भिंदंतो दंतघाएहिं ॥ ४४२ ॥ भयनट्ठतुरयथट्टं सुंडाए ताडिऊण पाडतो ।। तडयडतुटूंतजडं मोडतो वियडविडविगणं ॥ ४४३ ॥ तो तब्भयभरविहुरो पकंपिरो झत्ति नारिनरनियरो । हट्टऽट्टालयघरपुरपायारसिरेसु आरूढो ॥ ४४४ ॥ ताडिज्जंतो पडिकारपाणिपम्मुक्कजट्ठि-लेठूहिं । सभयजणरोलरुट्ठो करी गओ रायपासाए ॥ ४४५ ॥ तस्सावलोयणत्थं राया पासायसत्तममहीए । चडिओ कुमार-मंडलिय-मंति-सामंतसंजुत्तो ॥ ४४६ ॥ सच्चविओ रायाईहिं सो गओ उड्ढकयकरंगुलिओ । अहमेविक्को सूरो नन्नो त्ति पयासयंतो व्व ॥ ४४७ ॥ थीओ बाले वुड्ढे य हणइ महुलिहविरावकुविओ जो । अहवा मायंगाणं महुपाइजुआण किमकज्जं ? || ४४८ ॥ पुक्कारमुक्कसिक्करछडाकडप्पेण सिंचए अप्पं ।। जो जायमयवसुप्पन्नदप्पसंतावमिव समिउं ॥ ४४९ ॥ चलकन्नतालतियकणयकिंकिणीरणझणारवच्छलओ । ताले वायइ जो गज्जिवज्जिराउज्जछंदेण ॥ ४५० ॥ बालेण तेण बाला एक्का भयकंपिरा पणस्संती । जोव्वणभरालसगई दटुं वेगेण संगहिया ॥ ४५१ ॥ तो उच्चट्ठाणे ठियजणेण हाहारवं विहिय भणियं । रक्खह रक्खह नारिं हणिज्जमाणं गएण त्ति ॥ ४५२ ॥
Jain Education International
For Private & Personal Use Only
www.jainelibrary.org
