________________
सिरिअणंतजिणचरियं परिहरिऊणमसारं संसारं गिण्हिऊण पव्वज्जं । जत्तं करे निउत्तो तुह आणाए सिवसुहत्थं ॥ ४२९ ।। इय भवविरत्तचित्तं पुत्तं नाउं पयंपए राया । जइ न जुज्जइ वोत्तुं पि तुह इमं, किं पुणो काउं ? ॥ ४३० ॥ नियजीवियक्कएणं तमज्जिउ ता विमुंच रइ जइ तं । ता सपियस्स वि मह जीवियम्मि सलिलंजलिं देसु ॥ ४३१ ॥ तो सो सचिवेणुत्तो वच्छ ! न आणं गुरूण कुलजाया । नियपाणच्चायम्मि वि नूणं कइया वि लंघंति ॥ ४३२ ॥ जइ तुह समा वि सच्छा वच्छय ! सच्छंदचारिणो हुंति । ता नियमेण पउत्था सुपुरिसउप्पत्तिवत्ता वि ॥ ४३३ ॥ जइ न खयरिं विवाहसि आणा ता तुज्झ तायपायाण । इय भणिओ सो जंपइ तुम्हाएसो पमाणं मे ॥ ४३४ ॥ कायव्वो सद्धम्मो, गुरुआणालंघणम्मि सो कत्तो ? । जाणह जेण हियाऽहियविसए तुब्भे च्चिय विहेयं ॥ ४३५ ॥ तो साहु! साहु! साहु! ति जंपिउं रायमंतिपमुहेण । कुमरो सलाहिओ हरिसिएण अत्थाणलोएण ॥ ४३६ ॥ तो रन्ना खयरजुयं वत्थाभरणेहिं विहियसम्माणं । विन्नवइ पहु ! विवाहोवक्कमपवणा भवह तुब्भे ॥ ४३७ ॥ जाव अहं जामाउयलाहं साहेमि नहयरनिवस्स । लग्गं पि गणावेउं समेमि कुमराहवणकज्जे ॥ ४३८ ॥ इय जंपिय उप्पइयं तमालकाले नहे खयरजुयलं । उप्पायंतमणब्भं विज्जु मणिभूसणपहाहिं ॥ ४३९ ॥ रिद्धीए समारद्धो वीवाहोवक्कमो निवेणावि । पउणिज्जंति सुवत्थाई भूमिमणिभूसणाई पि ॥ ४४० ॥
Jain Education International
For Private & Personal Use Only
www.jainelibrary.org
