________________
जलसारकहा
झंपाए समुल्लसिरो सिंधुजले निवडिऊण तडिपुंजो । वडवानलो व्व रेहेइ नहमंडलजंतजालोहो || ८०५१ ॥
अच्चंतथूलामलजलधारा सारसलिलसंभारं । मुंचइ मेहो मोयाविडं व जलहिसमज्जायं ॥ ८०५२ ॥ सामयघणाली गयणे सामुक्कलियावली समुद्दम्मि । गज्जंती उ पसरंति दो वि गुरुगयघडाओ व्व ॥ ८०५३ || नीओ होइ घणो जलभरेण उल्लसइ तेण य समुद्दो । दोन्नि वि मिलणनिमित्तं परोप्परं संचरंति व्व ॥ ८०५४ ॥ एवं अकालभवमेहमंडलाडंबरं पलोएउं ।
सव्वो वि पवहणजणो जाओ कायव्वमूढमणो ॥ ८०५५ ॥ सेरसमीरुक्कलिया तोडियतणियागणो सियवडो वि । पवहणवइहिययं पिव पडिओ सह कूवखंभेण ॥ ८०५६ ॥
गुरुकल्लोलारोहावरोहआवत्तात्तभमणाई ।
अणुभविऊणं अभिडियगिरितडे विहडिओ पोओ ॥ ८०५७ ॥ अंगीकयगुरुकट्ठा तरिया के वि हु भवं व नीरनिहिं । अवरे उ अगुरुकट्ठा भवे व्व मग्गा समुद्दम्मि || ८०५८ ॥ पवहणवई वि बहुधणविणासदंसणविसायविवसंगो । मग्गो अगाहसलिले भववासे को सया सुहिओ || ८०५९ ॥ तयणुजलमाणुसीए मयणायत्ताए निययदईओ त्ति । आलिंगिओ जहट्ठियवत्थं न नियंति रायंधा || ८०६० ।। आयड्ढिय सलिलाओ भोगत्थं तीए गिरितडे नीओ । सुहपरिणईए जीवो व्व कड्ढिओ नरयमज्झाओ ॥ ८०६१ ॥ सा तं दठ्ठे न इमो पिओ त्ति भीया गया जले झति । सावायपरट्ठाणे को चिट्ठइ नायपरमत्थो ॥ ८०६२ ॥ सेलतडसिलासीणो सो चिंतइ मज्झ चेव पडिकूलो । एस हयविहिविलासो पुव्वज्जियदुकयवसयस्स || ८०६३ ||
Jain Education International
For Private & Personal Use Only
६२७
www.jainelibrary.org
