________________
जलसारकहा
६२५
पसरति अवसरंति य घडंति विहडंति दिति करणाई । उम्मुक्कसीहनाया वग्गंति य खग्गवग्गकरा ॥ ८०२५ ॥ अन्नोन्नछलप्पहरप्पवंचअन्नायखग्गघाएहिं । दोन्हिं वि पडियाई महीयलम्मि सहस त्ति सीसाइं ॥ ८०२६ ॥ तो तेसिं सीसाई पमुक्कहुंकारपेक्कहक्काई । अन्नोन्नं उच्छलिउं दंतेहिं डसंति अणुवेलं ॥ ८०२७ ॥ अवरोप्परासिदंडप्पहारजज्जरियअंगुवंगाई । जुज्झति कबंधाई वियच्छरियकराई कुमरस्स ॥ ८०२८ ॥ कुमरेणुत्तं मित्ता सीसकबंधाण रणसुक्करिसं । पेच्छह अतुच्छअच्छरियकारयं रोसवसयाण ॥ ८०२९ ॥ ते बिंति देवसिविणे वि नेव जं तं पि एत्थ सच्चवियं । इय जंपिराण पडियं धडदुगमवि पहरजज्जरियं ॥ ८०३० ॥ सियदंतकोडितोडियअवरोप्परवयणगंडखंडाइं । निच्चेट्ठाई होउं तस्सीसाई पि पडियाइं ॥ ८०३१ ॥ तो झ त्ति पिंगकेसरसडाकडारियसमग्गदिसियक्कं । तडिपुंजपिंजरियकयतयं व जायं सरहजुयलं ॥ ८०३२ ॥ उक्खित्तकरप्पमुक्कफारफुक्कारसिक्करासारो । वित्थारिज्जइ जेहिं दिणे वि तारयभरो व्व नहे ॥ ८०३३ ॥ अइघोरगज्जियारवरोइं तं पेच्छिउँ नरिंदसुओ । विम्हियहियओ जाओ भएण नट्ठो पुण वयस्सो ॥ ८०३४ ॥ तो भेरवभयजणयं सरहदुगं पि हु तिरोहियं सहसा । पेच्छइ य पुरो बहुसूरकिरणभरसमहियं तेयं ॥ ८०३५ ॥ तं पेच्छिय विम्हयओ चिंतइ कुमरो किमिंदयालमिमं । मइमोहधाउखोहणमहव मह किं पि अन्नयरं ॥ ८०३६ ॥ इय चिंतंतो कुमरो जा थिरकयलोयणो तयं नियइ । ता तेयअंतरट्ठियनरसरिसं पेच्छए किं पि ॥ ८०३७ ॥
Jain Education International
For Private & Personal Use Only
www.jainelibrary.org
