________________
६२४
सिरिअणंतजिणचरियं तम्मि रहनेउरचक्कवालनामं समत्थि गुरुनयरं । जम्मि तिमिराण भिन्नो लोओ मणिगिहपहा लोए ॥ ८०१२ ॥ जत्थ गुरुमुत्तियाओ हरिसहियाओ य सुपयचक्काओ । सउणासियसयवत्ता सईओ सरसीउ व सहति ॥ ८०१३ ॥ पणमंतखयरनरवइसिरिपिंगमणिप्पहा पिसंगपओ । जलहरसारो नामेण तत्थ खेयरवई अत्थि ॥ ८०१४ ॥ नियदाणवुड्ढिजियजलहरावली जलहरावली नामं ।। तस्सत्थि हत्थिमंथरसंचारा सहयरी सारा ॥ ८०१५ ॥ तीसे समत्थि जलरासिसिविणसूइयगहीरयावासो । जलसच्छप्पयई वि य कुमरो नामेण जलसारो || ८०१६ ॥ मयणो व्व अतणुरूवो समग्गजणविहियहिययवासो जो । कमलायरो व्व गुरुमित्तदंसणुल्लसियसुवियासो ॥ ८०१७ ॥ उत्तमकुलावयंसो वयंसजणगओ वि रायसुओ। कीलाकए कयाई वि पत्तो सायरगयगिरिम्मि ॥ ८०१८ ॥ वेलाजलचलणविग्घुट्टफुट्टगुरुसुत्तिमोत्तियप्पयरो । सामे जम्मि दिणम्मि वि विभाइ तारयसमूहो व्व ॥ ८०१९ ॥ तम्मि समित्तो कुमरो आरामपरं परं परिब्भमिरो । आयन्नइ पेक्काओ हक्काओ भिडंतसुहडाण ॥ ८०२० ॥ के नाम इमे जुझंति किं च वेरस्स कारणमिमेसिं । . पेच्छामो पुच्छामो त्ति जंपिरो सो गओ तत्थ ॥ ८०२१ ॥ तो तेण झ त्ति दिट्ठा दोन्नि भडा दंतदट्ठनियउट्ठा । कयभामभिउडिभाले रोसारुणलोयणकराला ।। ८०२२ ॥ समरारंभस्समवसगलंतपस्सेयबिंदुजालेण । रेणुप्पसमणकज्जे रणरंगं सिंचयंत व्व ॥ ८०२३ ॥ जुयलं ॥ मा जुज्झह मा जुज्झह ता मह नियवेरकारणं कहह । इय कुमरवारिया वि हु जुझंति समच्छरा दो वि ॥ ८०२४ ॥
Jain Education International
For Private & Personal Use Only
www.jainelibrary.org
