________________
६२०
सिरिअणंतजिणचरियं सामलसिहरानिलचलंततमालदलअंतरुल्लसिरधाऊ । जा नवघणोवईविप्फुरंततडिसंजुओ सहइ ॥ ७९६१ ॥ तम्मिं निवडिरनिज्झरणनीरसिक्करसमूहवहवाए । आरूढा गुरुसत्थवाह-वानरा रम्मआरामे ॥ ७९६२ ॥ तस्सग्गे पिंगमणिप्पहापिसंगियसमग्गदिसियक्कं । रविरहरयणं व नियंति उदयसेलम्मि जिणभवणं ॥ ७९६३ ॥ रयणीसु जं विरायइ पडिबिंबियभूरितारयप्पयरं । केवलमुत्ताजालयविरइयसिंगारचंगं व ॥ ७९६४ ॥ पेच्छंति तत्थ उवसंतकंतमुत्तिजिणेसरं रिसहं । जह जोग्गं न्हवणच्चण-थवणे काउं निविट्ठा ते ॥ ७९६५ ॥ दठूण जिणवरं वानराई बहुमाणजायपुलयाई । आणंदवसपवत्तं सुपुन्ननयणाई पणमंति ॥ ७९६६ ॥ तो तेहिं पक्कपीवरअंबय-नारंगबीजपूरेहिं । कयलीफल-दक्खा-दाडिमेहिं गंतुं जिणिंदपुरे ॥ ७९६७ ॥ पसरिय भत्तिब्भरुत्तिज्जमाणरोमंचअंचियंगेहिं । रइय बलिं मुक्कं बीजपूरयं सामिकरकमले ॥ ७९६८ ॥ (जुयलं) तत्तो अंतो उल्लसियअसमआणंदसंदिरच्छीणि । भूपुट्ठभालवर्ल्ड नमंति तिहुयणपहुं ताई ॥ ७९६९ ॥ तो भत्तीए गुरूणं नमिउं जंपति निययभासाए । पहु ! तुम्ह पसाएणं अम्हेहिं समज्जिओ धम्मो ॥ ७९७० ॥ भणइ गुरू धम्माओ नन्नं भुवणे वि अत्थि सारतरं । ता तिरियाई वि तुब्भे धन्नाई जेसिमियबुद्धी ॥ ७९७१ ॥ इय अणुसासिय वानरजुयलं आपुच्छिऊण सत्थाहं । नमिय जिणं अन्नत्तो गयणेणं विहरिया गुरुणो ॥ ७९७२ ॥ उत्तरिडं सत्थाहो गओ जहाभिमयदेसमसढमई । पावित्तु आउयंतं वानरजुयलं पि कईया वि ॥ ७९७३ ॥
Jain Education International
For Private & Personal Use Only
www.jainelibrary.org
