________________
६१४ .
सिरिअणंतजिणचरियं नय-नायरगुणनिज्जिय समग्गपुरपत्तवेजयंति व्व । तत्थत्थि वेजयंती नयरी मणिभवणकमणीया || ७८८३ ॥ गोरी-पन्नत्तीपमुहसिद्धविज्जापभावदुज्जेओ । विज्जाहरराया तत्थ अत्थि सिंगारसारो त्ति ॥ ७८८४ ॥ निम्मलनहकयसोहा पवित्तसब्भावभासियदिसोहा । तारावलि व्व जाया जाया तारावली तस्स ॥ ७८८५ ॥ तीसे असेसभुवणेक्कभूसणं रूवरेहविजियरइं । जाया मणुन्नकन्ना सिंगारतरंगिणी नाम ॥ ७८८६ ॥ सद्धिं सुहवण्णेणं कलाकलावेण तारतारून्नं । जायं तीसे सिंगारगारवुग्गारपरिकलियं ॥ ७८८७ ॥ कइया वि सा सहीयणसहिया मणिमत्तवारणासीणा ।। गयणे जंते चारणमुणिंदमिक्खिय गया मुच्छं ॥ ७८८८ ॥ चंदणरसच्छडासेयसिसिरकिरिओवलद्धचेयन्ना । संसुसहीहिं सा पुच्छिया तुमं मुच्छिया किमिह ? || ७८८९ ॥ आयन्नह त्ति जंपिय सा मुच्छाकारणं कहइ तासिं । संसारसरूवं पिव अत्थि अरन्नं अदिळेंतं ॥ ७८९० ॥ गुरुभूरिसाहिसाहासहस्स अंतरियअंतरिक्खम्मि । सावयभीउ व्व जहिं पक्खिवइ करे न सूरो वि ॥ ७८९१ ॥ पेच्छिज्जंतकुरंगं दरिद्दगामीण देवहरयं व । जं विगयरायचित्तं विरायए केवलिकुलं व ॥ ७८९२ ॥ तरुणो व्व विलसिरवओ विसालओ सरसकमलनियरो व्व । तत्थप्पसरियसालो अत्थि वडो पुरनिवेसो व्व ॥ ७८९३ ॥ बालायवदलनिम्मवियं व सव्वंगपिंगपहरोमं । अच्चंतचंचलं जं तरुणी अणुरायरईयं व ॥ ७८९४ ॥ धरमाणमरुणणयणं मसिणियघणघुसिणरसविमिस्सं व । वानरजुयलं परिवसइ पायवे तम्मि घणनेहं ॥ ७८९५ ॥ (जुयलं)
Jain Education International
For Private & Personal Use Only
www.jainelibrary.org
