________________
फलसारकहा
६१३
तं रज्जे अहिसिंचिय गिण्हइ सपिओ वयं जणयपासे । कयतवचरणो उप्पन्नकेवलो सिद्धिमणुपत्तो ॥ ७८७१ ॥ जह अक्खएहिं विहिया जिणिंदपूया इमेण नरवइणा । सिद्धिसुहकंखिणा तह कज्जा अन्नेण वि नरेण ॥ ७८७२ ॥ भणिओ अक्खयकित्ती अक्खयपूयाए संपयं तुब्भे । फलपूयाए निसामह फलसारं वागरिज्नं तं ॥ ७८७३ ।। (फलपूयोवरि फलसारकहा) विप्फुरिय-भूरिकरदुरवलोयमणिमंदिरावली कलियं । सूरोहकयावासं व अत्थि सूरप्पहं नयरं ॥ ७८७४ ॥ अन्नोन्न मिलियमणिगिहकरकिन्ननहम्मि पक्खिणो नूणं । वित्थारिय जालम्मि व न जम्मि पविसंति बंधभया ॥ ७८७५ ॥ सारयरविकरसरियपयावसंतावियाहिओ तत्थ । अस्थि प्पयावसारो नामेण निवो रणव्वसणी ॥ ७८७६ ॥ सव्वंगचंगनियरूवगव्वनिज्जिणियअच्छरा विसरा । तस्सत्थि हत्थिकुंभत्थलत्थणी जयसिरी जाया ॥ ७८७७ ॥ तन्नयणब्भमरगणं आणंदइ सुमणपत्तभरपरमो । फलसारो नामेणं दुमो व्व दूरन्नओ कुमरो ॥ ७८७८ ॥ कइया वि सहासीणे निवम्मि कुमराइरायमंतिजुए । झणहणिरकिंकिणिगणं विमाणमेगं समणुफ्तं ॥ ७८७९ ॥ तम्मज्झाओ पसरंतमणिमयाभरणकिरणदुनिरिक्खो ।। रविरहरयणाओ रवि व्व खेयरो झ त्ति नीहरिओ ॥ ७८८० ॥ पडिहारकयपवेसस्स तस्स सम्माणपुव्वमवणिवई । खयराहिराय ! साहसु आगमणत्थं ति जंपेसु ॥ ७८८१ ॥ सो आह-ससहरसिओ वेयड्ढो नाम वामदेवो व्व । गंगासिंधुपरिंगओ अत्थिगिरी य गरुयनयरसिओ ॥ ७८८२ ॥
Jain Education International
For Private & Personal Use Only
www.jainelibrary.org
