________________
६०६
विहियममरेण निवसुयहयरूवं तम्मि निवसुओ चडिओ | तो गंतुं दूरपहे गयणेण गओ हओ सहसा ।। ७७८० ।। गरुयगिरि-सरिय-नयराई गयणमग्गेण अइक्कमंतेण । अमरतुरएण वेरी सच्चविओ दुज्जओ इंतो ॥ ७७८१ ॥ तं दठ्ठे सो नट्ठो मोत्तुमणावलंबणं नरिंदसुयं । अप्पम्म विणस्संते परोवयारी हवइ विरलो || ७७८२ ॥ निवडइ रायंगरुहो रएण गयणंगणा निराहारो । सट्ठाणब्भट्ठाणं गरुयाण वि होइ वा पडणं ॥ ७७८३ ॥ अवरुंडिऊण धरिओ निवपुत्तो वानरीए निवडतो । सुहपुन्नपरिणईए जंतो जीवो व्व नरयम्मि ॥ ७७८४ ॥ कोमलकिसलयनिचए निवेसिउं तं जलासया सलिलं । घेत्तूण पत्तपुडए धोयइ दासि व्व तच्चरणे ॥ ७७८५ ॥ खज्जूर- कयलि - फल - दाडिमाइभोयाविय पाइउं सलिलं । तीए मिउदलरइए सत्थरए सोविओ तयणु ।। ७७८६ ।। उल्लयपूग - प्फल- नागवेल्लि - दलदावदड्ढगिरिचुन्नं । आणित्तु तीए दिन्नं तंबोलं भुंजइ कुमारो ॥ ७७८७ ॥ उवविसिय सम्मुही सा करकयकयलीदलेण कुमरतणुं । वीयंती अवलोयइ रायसुयं साणुरायच्छी ॥ ७७८८ ॥ भंजइ अविरयमंगं समुव्वहंती समुच्च रोमंचं । परिकंपिरंगजट्ठी ससज्झसासेयमुव्वहइ ॥ ७७८९ ।। दट्ठूण वानरीविलसियं तयं सव्वमेव निवपुत्तो । असरिसविम्हयपरवसमणवित्ती चिंतउं लग्गो || ७७९० ॥ एद्दहदुरयरा निवडिरं न मं वानरी जइ धरती । ता नूण विवज्जंतो अहं वि भिन्नट्ठिसंठाणो ॥ ७७९१ ॥ आसण- पयसोहण - भोयणाई तंबोलदाणपज्जंतं । अणुरत्तपियाए इव इमीए मह सागयं विहियं ॥ ७७९२ ॥
Jain Education International
सिरिअणंतजिणचरियं
For Private & Personal Use Only
www.jainelibrary.org
