________________
६०४
सिरिअणंतजिणचरिय
निवसंति तत्थ रवितेय-चंदतेयाभिहा अमरकुमरा । रवि-चंदा इव भमिरा हरंति तेएण तिमिराई ॥ ७७५४ ॥ निद्दालस्साइसरीरलिंगनिच्छईयचवणसब्भावो । जंपइ रवितेओ मित्त । चवणसमओ इमो मज्झ ॥ ७७५५ ॥ ता मं पत्तनरत्तं पडिबोहिज्जसु तुमं अवसरम्मि । इय जंपिउं चुओ सो सुमरियजिणगुरुचरणकमलो ॥ ७७५६ ॥ नयरम्मि धरासारे मणिमंदिररईयधरणिसिंगारे । जाओ राया सिरिरयणसुंदरो नाम रम्मंगो ॥ ७७५७ ॥ विलसंतरूवजोव्वणअभग्गसोहग्गसंगयंगीहिं । दईयाहिं समं विसए उवभुजंतो गमइ कालं ॥ ७७५८ ॥ कइया वि चंदतेएण मित्तदेवेण तस्स रयणीए । कहिओ सुरभवरईओ नरत्तपडिबोहवुत्तंतो || ७७५९ ॥ तं सोउं जाईसरणनाणनयणेण दिट्ठपुव्वभवो । जंपइ राया तुमए पडिवन्नं पालियं किं तु ॥ ७७६० ॥ पहु ! जोव्वणं नवं मणहरा सिरी असमसुहयरा विसया । रत्ताओ कंताओ भत्ता मित्ता अपुत्तो हं ॥ ७७६१ ॥ ता अज्ज वि असमत्थो अप्पहियं काउमाह अमरो वि । परमत्थविमूढमईण राय ईय उत्तराई जओ ॥ ७७६२ ॥ रोय-जरा-जोवणविणस्सरस्स तरुणियणमणहरस्सावि । का राय ! सारया जोव्वणस्स मोत्तुं तवच्चरणं ॥ ७७६३ ॥ चोरानल-जलरायग्गहाइबहुविहअवायसज्झाए । धम्मट्ठाणव्वयमंतरेण न सिरीए अत्थि गुणो ॥ ७७६४ ॥ सरसवसमसोक्खकरा सुरगिरिगुरुदुक्खदाइणो दूरं । अच्चासत्तीए तणुक्खयं न किं दिति निव ! विसया ॥ ७७६५ ॥ अंतो निन्नेहाणं पओसरयाहिं रंजिअजणाणं । किं सारं कंतारं मरणं ताणत्थहेऊणं ॥ ७७६६ ॥
Jain Education International
For Private & Personal Use Only
www.jainelibrary.org
