________________
६०३
अक्खयकित्तिनिवकहा को उच्छंगे धरिऊण मह कामकुमर ! कोमलकरहिं । संवाहतो काही आणंदमहूसवुक्करिसं ॥ ७७४१ ॥ कुंडलसरलुत्तरिया कंकण-केऊरमणिमयाभरणे । रंजिज्जतो दाही दाणे को बंदिविंदाण ? ॥ ७७४२ ॥ इय पलवंते संतेउरे निवे मंतिणा विमलमइणा । कुमरनिरक्खणकज्जे तुरयाणीयं समाइटें ॥ ७७४३ ॥ तं पि दुवालसजोयणमाणम्मि महीयले परिब्भमिउं । नवरं कुमारवत्तामित्तं पि न तेण संपत्तं ॥ ७७४४ ॥ तईयम्मि दिणे पसरंतसोयसंभारनिब्भरे नयरे । कुमरो खयरविमाणाऊरियगयणंगणो पत्तो ॥ ७७४५ ॥ नयणेहिं समं हरिसं वियासयंतो नरिंदलोयाण । पणओ जणणी-जणयाण तेहिं आलिंगिओ गाढं ॥ ७७४६ ॥ तो चेडीचक्कजुया कुमरगुरुणं नया कुमरवहूआ । आसीहिं ताण तुट्ठा सुद्धते संठिया गंतुं ॥ ७७४७ ॥ जंपइ जणओ तुमए दिन्नो किं अम्ह पुत्त ! दुक्खभरो । सो भणइ सुह-दुहाणं दाया देव्वो न चेव अहं ॥ ७७४८ ॥ रायाह सुह-दुहाणं जं अणुभूयं तए व हरिएण ।। तं साहसु त्ति तो कुमरसुमरिओ आगओ अमरो || ७७४९ ॥ तं दटुं मणि-कुंडल-किरीड-केउर-कंकणाहरणं । विम्हियमणो निवो पूईऊण तस्सासणं देइ ॥ ७७५० ॥ तत्थुवविसिउं सो कुमरपेरिओ कहइ हरणवुत्तंतं । पायालम्मि पुरी अत्थि चमरचंच त्ति मणिभवणा ॥ ७७५१ ॥ जीए सामारुणसियमणिभवणपहाहिं संवलिज्जंता ।। अमरा भमंति मयणाहिघुसिणचंदणविलित्त व्व ॥ ७७५२ ॥ तत्थावट्ठियजोव्वणसुरंगणागणविलासदुल्ललिओ । धुव्वंतचारुचामरचमरो नामेण अमरवई ॥ ७७५३ ॥
Jain Education International
For Private & Personal Use Only
www.jainelibrary.org
