________________
५९६
सिरिअणंतजिणचरियं
तुम्हारिसा वि उत्तमकुलुब्भवा जइ मुयंति मज्जायं । ता बंधव ! अकुलीणाण पावकारीण का वत्ता ? || ७६५१ ॥ किं निय पियासरीराउ मह सरीरम्मि समहियं किं पि ? । दिळं जं भाय ! तुमं संपइ जंपसि अवत्तव्वं ॥ ७६५२ ॥ वित्थरइ जरा परिगलइ जोव्वणं जाइ जीवियव्वं पि । किं नाम सासयं तुह देहे जमकज्जसज्जो सि ॥ ७६५३ ॥ मुत्तंतपुरीसवसावासे दुग्गंधमलविलीणम्मि । मह देहे किं सारं जं रायरसे तुहुक्करिसो ॥ ७६५४ ॥ एत्थंतरम्मि चउनाणनायनियपुत्तपाववुत्तंतो । तब्बोहत्थं सिरिकिरणवेगसूरी तहिं पत्तो ॥ ७६५५ ॥ . तेणुत्तो भो सावय ! किं तुज्झ कुलक्कमो इमो जमिमं । पारद्धं तुमए निंदणिज्जमुत्तमनराण जओ ॥ ७६५६ ॥ लज्जिज्जइ जेण जणे मइलिज्जइ नियकुलक्कमो जेण । कंठट्ठिए वि जीए कुणंति न कयाइ तं सुयणा ॥ ७६५७ ॥ किं पुत्त ! पिइ-पियामह-पमुहेहि-वयं कयं हवइ जेसिं । ते ईय निम्मज्जाया तुमं व पावप्पिया हुंति ॥ ७६५८ ॥ अवरं च इमा भइणी सहोयरा तुह मुणेमि नाणेण । जं रयणपायाराहिवरयणाभरणभूवइणो || ७६५९ ॥ तं अंगरुहो जेट्ठो एसा वि सुया कणिट्ठिया तस्स । वच्छ ! मए तं हरिओ निवभवणा मासमेत्तवओ ॥ ७६६० ॥ कुमरीवयणविरत्ते चित्ते पिइसिक्खणेण संवेगो । लग्गो खेयरवइणो पासियवत्थम्मि रंगो व्व ॥ ७६६१ ॥ तो तेण पायजुयले लग्गेऊणं खमाविया भइणी । उत्थंभिउं कुमारं पणमिय सूरीण विन्नत्तं ॥ ७६६२ ॥ पहु ! मोहमहाकूवे अविवेयजले निमज्जिरो तुमए । नियवयणवरत्ताए उद्धरिओ हं दयानिहिणा || ७६६३ ॥
Jain Education International
For Private & Personal Use Only
www.jainelibrary.org
