________________
५९५
कुसुमसेहरकहा हे देव्व ! निद्दओ तं बालं पुत्तं तया हरेऊण । कन्नं पि अवहरंतो खयम्मि खारं खिवसि खुद्द ! ॥ ७६३८ ।। हा मह सहा वि सुन्ना तुह विरहे कुसुमसेहरकुमार ! । एरिसदुहदंसणत्थं पवसंतो तं मए धरिउं ॥ ७६३९ ॥ अंतेउरपउरजणेणं राइणा तह तया तहिं रून्नं ।। जह नयणजलासारो वित्थरिओ वरिसयालो व्व ॥ ७६४० ॥ एवं पलवंताणं ताणं तइए दिणे तरणिउदए । खयरविमाणगणेणं पत्तो कुमरी जुओ कुमरो ॥ ७६४१ ॥ पणओ य महीवइणा सखेयरो निवसुया वि तं नमइ । आपुच्छिय कुसलाई ताई निविट्ठाई निवपुरओ ॥ ७६४२ ॥ रायाह कुमर ! साहसु हरणागमणाण निययवुत्तंतं । तो तं कुमराणाए कहिउं लग्गो खयरचक्की ॥ ७६४३ ॥ देवत्थि दियवरम्मि व वेयड्ढे गुरुगिरिम्मि मणिभवणं । नयरं रहनेउरचक्कवालनामं मणभिरामं ॥ ७६४४ ॥ तं परिपालइ विज्जाहराहिवो नयणवेगअभिहाणो ।। गहियव्वयसिरिकिरणवेगखयरिंदअंगरुहो ॥ ७६४५ ॥ दाहिणनंदीसरगरुयवेगवलिएण तेण सच्चवियं । अन्नोन्नं परिसत्तं पडंतमित्थीपुरिसजुयलं ॥ ७६४६ ॥ अच्चंतरूवरमणीरमणं पइरइयबुद्धिणा तेण । तदुगमवि अवहरिउं नीयं सेले विसालग्गे ॥ ७६४७ ॥ तो थंभणीए विज्जाए थंभिउं पुरिसमाह रमणिं सो । मं अणुरत्तं भत्तं भत्तारं सुब्भु मन्नेसु ॥ ७६४८ ॥ तीयुत्तं तं सुपुरिस ! भाया मह नियसहोयरसरिच्छो । ता उभयभवविरुद्धं तुमए नो किं पि वत्तव्वं ॥ ७६४९ ॥ अवरं च न सायत्ता अहं जओ जणयदिन्निया कन्ना । वीवाहिज्जइ सेच्छा जुत्ता न भवारिसाणं पि ॥ ७६५० ॥
Jain Education International
For Private & Personal Use Only
www.jainelibrary.org
