________________
सिरिअणंतजिणचरियं
रे रे ! दुट्ठ ! गयाहम ! मोत्तुं नारिं वलेसु मह समुहं । जइ सत्तमत्थि इय सुयकुमरालावो भणइ कुमरी ॥ ७६२५ ॥ मह कीडियकप्पाए कज्जे भुवणोवयारकरणखमं । नररयण ! मा विणाससु अत्ताणं करिकयंताओ || ७६२६ ॥ सुयकुमरीविन्नवणो सो जंपइ तम्मि भुवणगब्भम्मि | वससि तओ रक्खिस्सं चइउं पाणे वि तं नियमा ॥ ७६२७ ॥ मह करा व चाडूणि करेइ कुमरस्स इय विभावेउं । कुविएण व करिणा सा खित्ता दूरं गयणमज्झे ॥ ७६२८ ॥ विज्जाहरिं व गयणे गच्छंतिं तं पलोइरो कुमरो । जाओ पमत्तचित्तो तो संगहिओ गइंदेण ॥ ७६२९ ॥ मिलसु नियवल्लहाए तुमं पि इय चिंतिउं च कुविएण | करिणा कुमरो वि नहे खित्तो तीए पडंतीए ॥ ७६३० ॥ मरिही एसा एद्दहदूरा रयनिवडिय त्ति कलिऊण । परिसित्ता करुणा नेहेण व तेण सा गाढं || ७६३१ ।। आलिंगियाए तीए पडइ अहो निवसुओ निराहारो । थीफासलालसाणं अहोगईए न संदेहो ॥ ७६३२ || एत्थंतरम्मि वेगागएण नहयरनरेण एक्केण । तद्दुगमवि अवरुंडिय नरनयणा गोयरे नीयं ॥ ७६३३ || तो पलवंतो लोगो अतरंतो लग्गिउं खयरमग्गे । गंतूण कहइ रन्नो कुमारकुमरीणमवहरणं ॥ ७६३४ || तं सोउं आउलिओ चलिओ राया निरिक्खणे ताणं । पेरियतरलतुरंगो परियडर पुरस्स चउपासं ॥ ७६३५ अप्पत्ततप्पउत्ती दूरयरमहिं पलोइउं वलिओ । रुयइ रुयावियलोगो सहमागंतुं गुरुसरेण ॥ ७६३६ || हा वच्छे ! हा सच्छे ! हहा अतुच्छे ! हहा विणयदच्छे ! । हा सुकुमाले बाले ! अवहरिया केण तं कहसु ? ॥ ७६३७ ॥
५९४
Jain Education International
For Private & Personal Use Only
www.jainelibrary.org
