________________
५९०
सिरिअणंतजिणचरियं
चित्त व्व चित्तवासा अमुक्कपासा सकीयछाय व्व । निययप्पयइ व्व सया जा दुम्मोया मणायं पि ॥ ७५७४ ॥ ताणत्थि तारतारुन्नललियलायन्नपुन्नसव्वंगी । अंगीकयसयलकला कन्ना रयणावली नाम ॥ ७५७५ ॥ पीयाए सूराए इव भूदिट्ठाए वि जीए होइ उम्माओ । तरूणाण विवेईण वि अविवेईणं तु का गणणा ? || ७५७६ ॥ . सा जत्थ जत्थ कीलाकरणकए जाइ रूवविजियरई । गच्छंति तत्थ तत्थ य परव्वसा सेवय व्व नरा ॥ ७५७७ ॥ कईया वि मयंकमुही सहीजुया सा सुहासणासीणा । सियछत्तचलिरचमरालंकरिया निग्गया नयरा ॥ ७५७८ ॥ पत्ता य मत्तमहुयरनामे सिसिरडुमम्मि आरामे । दठूण मयणभवणं उत्तिन्ना जा विसइ तत्थ ॥ ७५७९ ॥ ता निययरंगमंडवगवक्खभद्दासणट्ठियं एक्कं । रायकुमारं मयणं व निग्गयं भवणगब्भाओ ॥ ७५८० ॥ करकलियकेलिकमलं नियरूवनियंबिणी जणियमयणं । सुसिणिद्धमुद्धदीहच्छिजोण्हधवलीकयग्गनहं ॥ ७५८१ ॥ तं पेच्छिउं मयच्छी चिंतइ को एस दीसइ महप्पा । अच्चब्भुयरूवधरो सिंगारी चारुतारुन्नो ॥ ७५८२ ॥ नूणं पच्चक्खो च्चिय एसो धम्मो इमाओ संजायं । जं मज्झ अणिमिसत्तं सहस त्ति निरंतरायसुहं ॥ ७५८३ ॥ पुव्वभवुप्पन्नमहापुन्नारामेण तीए फलियव्वं । तूलि व्व अंगसंगं इमस्स जा पाविही बाला ॥ ७५८४ ॥ स च्चिय जयप्पवित्ता विलसंतसुवन्नरयणरमणीया । जा मुद्दिय व्व लिहिही करगहणमिमस्स सुहयस्स ॥ ७५८५ ॥ स च्चिय उत्तमगमणा विब्भमरहिए सुपत्तरसजाए । रमिही इमस्स जा माणसे सया रायहंसि व्व ॥ ७५८६ ॥
Jain Education International
For Private & Personal Use Only
www.jainelibrary.org
