________________
५८४
सिरिअणंतजिणचरियं चलचरणरणज्झणमाणमंजुमंजीरकंकणकराहिं । पहरईयरासयाहिं गिज्जतो रायरमणीहिं ॥ ७४९७ ॥ नहचलमुत्ताहलहारलसिरछत्तत्तएण विलसंतो । वीइज्जंतो सियचामरेहिं सयमेव ढलिरेहिं ॥ ७४९८ ॥ नहचलमणिजणियसपायवीढसीहासणेण सोहंतो । जुत्तो पुरो पगच्छंतरयणमयधम्मचक्केण ॥ ७४९९ ॥ मंदानिलचलिरं चलरणंतमणिकिंकिणीकलावेण । मणिदंडेणं धम्मद्धएण पुरओ विरायंतो ॥ ७५०० ॥ हत्थिहयरहसुहासणपमुहेहिं महिं नरिंदजाणेहिं । पूरंतो गयणं पि हु अमरिंदविमाणविंदोह ॥ ७५०१ ॥ अवहरमाणा चउदिसि पणवीसइ जोयणाणि लोयाण । दुभिक्ख-डमर-दुम्मारिसमररोगाइउप्पाए ॥ ७५०२ ॥ पणमिज्जंतो मग्गटुप्पासआरामदुमसमूहेहिं । नहपहसंपत्तेहिं पक्खीहिं पयाहिणिज्जंतो || ७५०३ ॥ पुरनयरग्गामागरपमुहट्ठाणेसु समवसरणठिओ । पडिबोहंतो करुणाए तिरि-सुरासुर-नरवूहं ॥ ७५०४ ॥ सुर-नर-किंकरताडियदुंदुहि-नीसाण-ढक्कपमुहेहिं । बहिरंतो बंभंडं वज्जिरआउज्जसद्देहिं ॥ ७५०५ ॥ मेहकुमारामरगंधवारिवरिसावहरियरयपरारं । रिउ-सुरविकिन्नकुसुमं समक्कमंतो महीवीढं ॥ ७५०६ ॥ संपत्तोऽणंतजिणो सुरट्ठदेसावयंससंकासं । सिरिविमलगिरिगिरिंदं समुन्नयं तित्थनाहं व ॥ ७५०७ ॥ (कुलयं) पन्नासजोयणाई विच्छिन्नो अट्ठजोयणुच्चो जो । दसजोयणाई सिहरे रम्मारम्मम्मि वित्थिन्नो || ७५०८ ॥ सहइ वसंते कुसुमियदुमावली धवलिओ समंतो जो । हिमगिरिवरो व्व अहवा वेयड्ढाणीयकूडो व्व ॥ ७५०९ ॥
Jain Education International
For Private & Personal Use Only
www.jainelibrary.org
