________________
॥ ७४७२ ॥
५८२
सिरिअणंतजिणचरियं कप्पूरचारुचंदणमयणाहिरसच्छडाहियसुयंधो । विप्फुरियरयणकिरणे परिट्ठिओ कणयथालम्मि ॥ ७४७२ ॥ सायरमुक्खित्तो अणंतबलमहाराय-मंति-तिलएण । अच्चिज्जतो सुरअसुरखेयर-क्खित्तकुसुमेहिं ॥ ७४७३ ॥ गिज्जंतो रयणाभरणभासुरंगीहिं रायरमणीहिं । पेच्छिज्जंतो सुरदुंदुहीसरप्पत्तपउरेहिं ॥ ७४७४ ॥ आढयमाणो पत्तो पुव्वपओलीए मंगलीयबली । तो तव्वेलं सद्धम्मदेसणा उवरया पहुणो ॥ ७४७५ ॥ (कुलयं) करयलकयबलिथालो मंती दाउं पयाहिणाण तिगं । ठाऊण सामिपुरओ उच्छालइ फुरियबहुमाणो || ७४७६ ॥ तस्सद्धं गयणाओ वि गहियं अमरेहिं सेस अद्धं तु । गिण्हंति निवा सेसं तुलिंति पागयनरा सव्वे ॥ ७४७७ ॥ तम्मि भवणट्ठियम्मि रोगा. पुव्वुब्भवा उवसमंति । अवराण पुणुप्पत्ती न होइ छम्मासकालं जा ॥ ७४७८ ॥ एत्थंतरम्मि सीहासणाओ सामी अणंतजिणराओ । उज्जइ पणमिज्जंतो समकालुट्ठियनरसुरेहिं ॥ ७४७९ ॥ कमकणयपंकयक्कमगमणो गुरुहत्थिमंथरं सामी । निग्गंतुमंतराए मणितोरणजुयपओलीए ॥ ७४८० ॥ माणिक्ककणयनिम्मियपायारदुगंतरालदेसम्मि । ईसाणकोणरइए माणिक्कमए सिलापट्टे ॥ ७४८१ ॥ नवणीयमिउप्फासे अल्लीणो देवछंदए सामी । उल्लसिय भत्तिभरकयतिहुयणजणजयारावो || ७४८२ ॥ उवविसियपायवीढे जसाभिहो पढमगणहरो सुजसो । सजलजलयब्भणीए पारद्धा देसणं काउं ॥ ७४८३ ॥ अमरासुरनहयरनरनरिंदपरिसाए मुच्छियजणस्स । साहइ निस्संखे वि हु भवे मणोगयवियप्पे वि ॥ ७४८४ ॥
Jain Education International
For Private & Personal Use Only
www.jainelibrary.org
