________________
सिरिअणंतजिणचरियं उण्हालइ लूयाओ व दहति देहीण देहलइयाओ । धत्तूरयभुत्तीउ व वेयल्लं दिति सहसत्ति ॥ ३८० ॥ तक्करधाडीओ विव सव्वस्सं पि हु झड त्ति गिण्हंति । किं बहुणा मारंति य जममुत्तीओ व्व पावाओ ॥ ३८१ ॥ बाहिं चेव मिऊणं अंतो तिव्वाणकत्तियाओ व ।। आसत्ता महिलाणं हवंति जे ते खयं जंति ॥ ३८२ ॥ ता बज्झवित्तिसरलासु हिययकुडिलासु वच्छ ! महिलासु । मा वीससेज्ज कइया वि, वंछसे जइ सया वि सुहं ॥ ३८३ ॥ निवडति नूण नरयम्मि निवइणो जाय ! विहियअन्नाया । सिरधरियमउडमिसरज्जगुरुभरक्कंतगत्त व्व ॥ ३८४ ॥ सपहुत्तमहाहंकारतिमिरपच्छाइयच्छिजुयल व्व । किच्चाकिच्च-हियाहियकहयं कइया वि न नियंति ॥ ३८५ ॥ सत्तंगरज्जवज्जप्पहारउप्पन्नघोरमुच्छ स्व । नाऽऽयन्नंति नरिंदा हिओवएसाण लेसं पि ॥ ३८६ ॥ पमयायत्ता तणमिव गणयंता सव्वहा वि परलोयं । इहलोय-पारलोइयसुहाण चुक्कंति नूण निवा || ३८७ ॥ ता जाय ! कमागयरायलच्छिपत्तं तुमं धुवं भवसि । ता तह जएज्ज न जहा तुज्झ कुले एइ वयणिज्जं ॥ ३८८ ॥ सेयं वा किण्हं वा गुरूण वयणं पमाणयं नेयं । ते च्चिय सया वि कुसला जं जुत्ताऽजुत्तवत्तव्वे ॥ ३८९ ॥ एसो हिओवएसो जं तुह सिक्खावियक्खणस्सावि । दिन्नो तं नियकप्पो त्ति भणिय मंती ठिओ मोणे ॥ ३९० ॥ तं सोउं विणयप्पणइपुव्वयं कयकरंजली कुमरो । जंपइ मह ताय ! कओ तए पसाओ हियं भणिउं ॥ ३९१ ॥ अवरं पि समुचियं मह सिक्खं निच्चं पि दिज्ज ताय ! तुमं । जेण ठवेमि सिरम्मिं चूडारयणं व तं निच्चं ॥ ३९२ ॥
Jain Education International
For Private & Personal Use Only
www.jainelibrary.org
