________________
५७८
सिरिअणंतजिणचरियं तत्थ वि य माणुसत्तं दुलहं तम्मि वि य आरियं खित्तं । तत्थ वि सुकुलुपत्ती तीए वि हु धम्मजिन्नासा ॥ ७४२० ॥ तीए वि थिरत्तगुणत्तियाए धम्मोवएसओ दुलहो । सो तित्थयरो तग्गणहरो व संघाओ वा को वि ॥ ७४२१ ॥ दुप्पप्पं पि हु पत्तं के वि हु बोहिपमायमयमत्ता । रायंधा मोहवसा कामायत्ताय हारिति ॥ ७४२२ ॥ अइदुल्लहत्तमवगच्छिऊण बोहीए भव्वसत्तेहिं । तह जइयव्वं जह सा लद्धा नो सरइ कइया वि ॥ ७४२३ ॥ एसा उ सुगुरुदुलहत्तभावणा पत्तं दुलहबोहिस्स । सलहत्तं संपज्जइ धम्माणुट्ठाणकरणेणं ॥ ७४२४ ॥ धम्माणुट्ठाणं पुण नज्जइ सिद्धंतसारसवणेण ।। सिद्धंतसारसवणं कज्जं सुविहियगुरुसयासे || ७४२५ ॥ सुगुरूवि पुणो ससमय-परसमय-विसारओ सरलहियो । इंदियविणिग्गहपरो कोहाइचउक्कनिम्महणो ॥ ७४२६ ॥ अनिययवित्तिविहारी अप्पमाई निम्ममो पसंतप्पा । कुसलो तत्तवियारे पयासओ पवयणत्थस्स ॥ ७४२७ ॥ सज्झाय-ज्झाणरओ समुज्जुओ सत्तहियपवित्तीए । संतोसपरो सपरोवयारकरणुज्जुओ मइमं ॥ ७४२८ ॥ सव्वमहव्वयजुत्तो निग्गंथो णीहओ फुरियकरुणो । पंच समिओ तिगुत्तो थिरो सुसीलो विमलकित्ती ॥ ७४२९ ॥ एवं गुरुगुणनिलओ तिलओ निस्सेससमणसंघस्स । सो तित्थयरो अहवा गणहारी अहव सूरिवरो ॥ ७४३० ॥ एरिस गुणरूवो जो सो भवसिंधुवइतारणतरंडो । पुव्वावरबाहयवयणभासओ नो गुरु गज्झो ॥ ७४३१ ॥ भवकोडिसयदुलंभं पावेउमविप्पयारयं सुगुरुं । पत्ता अणंतसत्ता तस्साणाए सिवपुरम्मि ॥ ७४३२ ॥
Jain Education International
For Private & Personal Use Only
www.jainelibrary.org
