________________
५७०
सिरिअणंतजिणचरियं रायाह जायसच्चोवयारमूलम्मि धम्मकरणिज्जे । साहिज्ज कुव्वंतो किन्न तुमं पुत्त ! उवयारी ॥ ७३१७ ॥ जाव तुमं सुपुत्तो नीओ निच्चं सयं रिउगणो वि । अब्भुद्धरिया मित्ता सयणा सम्माणिया सययं ॥ ७३१८ ॥ भरिय भवणंतरालो समज्जिओ जसहरो गुरू पत्तो । किमुज्जअणुववन्नं न देसि जं वयभरं चरिओ ॥ ७३१९ ॥ सव्वविरइव्वयायरणमिच्छणो कुणसि जाय जइ विग्धं । ता तुह मह पयआणा न कुलीणो खलइ पिउवयणं ॥ ७३२० ॥ जणयाणाभंगभयातो खयरिंदो समस्सिओ मोणं । तो कारविओ पिउणो अहिसेओवक्कमो रन्ना ॥ ७३२१ ॥ गुरुरिद्धिवित्थरेणं अहिसिंचिय नियपए खयरचक्कि । कयकायव्वो त्ति निवो दिक्खागहणुज्जुओ जाओ ॥ ७३२२ ॥ न्हाओ दहि-दुव्व-क्खय-सरसव-गोरोयणा विराइसिरो । रयणाभरणविलेवणवरवत्थालंकियसरीरो ॥ ७३२३ ॥ रणझणिरकणयकिंकिणि-विरायमाणाए रयणसिबियाए । आरुहियसमुवविट्ठो मणिमयसीहासणुच्छंगे || ७३२४ ॥ चलिओ वज्जिरनिरवज्जमंजुलाउज्जसरभरियभुवणो । वंदियणुघुट्ठजओ पारद्धातुच्छपेच्छणओ ॥ ७३२५ ॥ पूरंतो गयणयलं खेयरवइमणिविमाणविंदेणं । नहयरनियंबिणीजणपयट्टनट्ट पलोयंतो || ७३२६ ॥ दितो दाणं बहिरंध-दीण-दुत्थीय-जणाणमणवरयं । कुव्वंतो बहुमाणं चउविहस्सावि संघस्स ॥ ७३२७ ॥ सम्माणंतो सयणे पूयंतो जिणवरिंदबिंबाई । गुरुरिद्धीए मयरंदसुंदरुज्जाणमणुपत्तो ॥ ७३२८ ॥ सिबियाए समं मुत्तूण पंचछत्ताइरायचिंधाई । गंतुं केवलिपासे तं नमइ पयाहिणे पुव्वं ॥ ७३२९ ।।
Jain Education International
For Private & Personal Use Only
www.jainelibrary.org
