________________
५६७
सिंगारमउडकहा मा पडिबंधं काहिसि देवाण पिय त्ति जंपिओ गुरुणा । इच्छंति भणिय पुहुपयपणओ पत्तो सपासाए ॥ ७२७८ ॥ सुमुहुत्ते अहिसिंचिय सो रज्जे कमलपरिमलं कुमरं । मुत्तुं गोत्तिं पूईय जिणेसरे दिन्नदीणधणो ॥ ७२७९ ॥ सिवियारूढो कइवि निवेहिं जुत्तो कलत्तकलिओ य । रिद्धीए गुरुसयासे पत्तो तो दिक्खिओ तेहिं ॥ ७२८० ॥ जाणिय गहणासेवणसिक्खो तिव्वं तवं समायरइ । मुणिचक्कवालकिरियकलावकरणुज्जुओ संतो || ७२८१ ॥ किं तु न आलोयंतेण तेण सपिएण निययअइयारे । सरियं धणेसरसुयावहारपावं गुरूण पुरो ॥ ७२८२ ॥ पज्जंताराहणवससमुवज्जियपरमपुन्नपब्भारो । संपत्तो सपिओ वि हु विजयविमाणम्मि रायरिसी ॥ ७२८३ ॥ तेत्तीससागराइं तत्थुवभोत्तुं अणुत्तरं सोक्खं । कमलायररायसुरो तो चविओ तब्विमाणाओ ॥ ७२८४ ॥ जाओ तुमं नरेसरपोढप्पयावप्पणासियारिगणो । कमलावली सुरो वि हु संजग्गो तुह पिया एसा ॥ ७२८५ ॥ मरिउं धणेसरो वि हु भमिउं तिरि-नरय-नर-सुरभवेसु । बालतवच्चरणज्जियवंतरभावेणमुप्पन्नो ॥ ७२८६ ॥ नग-नगर-काणणाइसु कीलंतो भमइ तिरियलोगम्मि । तुह कुमरकलागहणूसवम्मि पत्तो पुरे तुज्झ ॥ ७२८७ ॥ एत्थंतरे धणेसरसुयावहारुब्भवं कुकम्मं ते ।। उदए समागयं जं कम्मफलं भुंजइ भवत्थो ॥ ७२८८ ॥ तो तेण वंतरेण दिट्ठो तं रज्जसिरिअलंकरिओ । जाओ य महाकोवो तव्वेलं चेव तो तस्स || ७२८९ ॥ किं कारणमप्पुव्वे वि मह निवे कोवकलुसया जाया । इय चिंतिउं विभंगेण जाणियं तेण सुयहरणं ॥ ७२९० ॥
Jain Education International
For Private & Personal Use Only
www.jainelibrary.org
