________________
५५८
सिरिअणंतजिणचरियं नेहेण विसेणं पिव मुच्छं गच्छंति पाणिणो हच्छं । नेहेण कलेणं पिव कलिया न तरंति निग्गंतुं ॥ ७१६२ ॥ दाहज्जरो व्व नेहो संतावयरो पिया विओगम्मि । गिम्हसमओ व्व नेहो दूरं परिवद्धए तण्हं ॥ ७१६३ ॥ पावंति परेऽवस्सं सत्ता नेहाओ आसवाओ व्व । नेहेण सुन्नहियया हवंति भूयाभिभूय व्व ॥ ७१६४ ॥ रोगेण व नेहेणं नासइ सत्ताण सव्वहा वि छुहा ।। अवहरइ विच्छएणं नेहे निदं असरिसो व्व ॥ ७१६५ ॥ नूणं निरंतराओ न तवे ते वि उ मए भवे पुव्वो । तेणप्पिया विवत्ती अकालपत्ता वि संवुत्ता ॥ ७१६६ ॥ ता इण्हि तवचरणं करेमि संसारवासअवहरणं । जह न विरसावसाणा विडंबणा होइ कईया वि ॥ ७१६७ ॥ नवरं केवलिकहियं कुमरं परिणाविऊण कन्नमिमं । दाऊण तस्स रज्जं पव्वज्जमहं करेमि लहुं ॥ ७१६८ ॥ ईय परिभाविय खयराहिराइणा तेण हं पडीहारो । आइट्ठो कुमर ! तुहाणयणयनिमित्तं विमाणेण ॥ ७१६९ ॥ केवलिकहियुज्जाणे पत्तो तं तुज्झ पुच्छमाणस्स ।। कहिओऽऽनयणे हेउ त्ति जंपिउं सो ठिओ मोणे ॥ ७१७० ॥ गुरुवेगविमाणेणं पत्तो वेयड्ढमिक्खए कुमरो । नियतारपहाधवलियदियंतरं सेयदीवं व ॥ ७१७१ ॥ तम्मि रहनेउरचक्कवालनयरम्मि रयणभवणम्मि । संपत्तो सुरलोए जीवो व विमाणरमणीए ॥ ७१७२ ॥ तस्संतो माणिक्कप्पासाए पेच्छिरो दुरवलोए । दीवंतररविणो विव राहुभया दुग्गमल्लीणो ॥ ७१७३ ॥ संपत्तो अत्थाणे पसरियमणिकिरणहरिधणुगणम्मि । नीलमहानीलपहा मेहब्भमनच्चिरमऊरे ॥ ७१७४ ॥
Jain Education International
For Private & Personal Use Only
www.jainelibrary.org
