________________
सिंगारमउडकहा सुन्ना सेज्जा नयरं निरुव्वसं मंदिरं मसाणसमं । गयगमणि तुज्झ विरहे नयणालंबणं पि गयं ॥ ७१४९ ॥ वल्लहपिया विउत्तो हत्थं मुच्छिज्जए अणुकलं पि । सिसिरकिरियाहिं वारं वारं कीरइ सचेयन्नो ॥ ७१५० ॥ तो सोयविहुरिएहिं अमच्च-सामंतमंडलीएहिं । चंदण-दारूहिं कओ देवीए सरीरसक्कारो || ७१५१ ॥ काऊणं मयकिच्चं पयचारेणेव नरवई चलिओ । निस्सद्दबंदिविंदो चत्तछत्ताइनिवचिंधो ॥ ७१५२ ॥ परिहरियालंकारो दूरपरिचत्तगीयझंकारो । भूमितलपत्तनयणो कयमोणो भवणमणुपत्तो ॥ ७१५३ ॥ अत्थाणं पमयवणं कीलासेलो सकमलपुक्खरिणी । दईया महापवासे दिति दुहं से जओ भणियं ॥ ७१५४ ॥ एत्थ ट्ठिया इह भमिया एत्थ य कुविया पसाइया एत्थ । रमियट्ठाणाई विणा पियाए जायाई दुसहाई ॥ ७१५५ ॥ रयणावलिं सरंतं नाउं ईसालुयउवमई त्ति । निद्दा-छुहा-रई-चिइ-बुद्धी व खणं पि नरनाहं ॥ ७१५६ ॥ अणुदिणमवि सो झिज्जइ सामलपक्खुब्भवो मयंको व्व । सुपयासाए पियाए रहिओ पुन्निमनिसाए व्व ॥ ७१५७ ॥ दढयरहियओ होउं संधारिउमप्पमप्पणा लग्गो । नूणं भवुब्भवाणं वत्थूण मण्णिज्जया जेण ॥ ७१५८ ॥ "किर कस्स थिरा लच्छी, कस्स जए सासयं पिए पेम्मं । कस्स व निच्चं आउं भण को व न खंडिओ विहिणा ?" || ७१५९ । इय नायभवसहावा तणं व परिहरिय सव्व वासंगा । उसहाइणो जिणिंदा करिंसु तिव्वं तवच्चरणं ॥ ७१६० ॥ नंदंतु चिरं ते चेव बालकालाओ चित्तसामन्ना । न कयाइ जेहिं नायं ससिणेहपिया विओयदुहं ॥ ७१६१ ॥
Jain Education International
For Private & Personal Use Only
www.jainelibrary.org
