________________
५५०
तं परिपालइ नहयरनरेसरो फुरियगुरुतरपयावो । साहिय अणेगविज्जो बलवं हारप्पहो नाम ॥ ७०५८ ॥ जो पाउसो व्व घणमंडलग्गअवहरियरायहंसो वि । तं चित्तं जं सियरायहंसकमलोदओ सहइ || ७०५९ ॥ भूगोयराण मज्झमि खेयरा उत्तमा भुवणगब्भे । तेसिं पि गयणवल्लहपुरसामी उत्तमो नूणं ॥ ७०६० ॥ ता जेण समो भुवणे वि नत्थि को वि हु दुज्जओ राय ! । चाएण विक्कमेणं पहुपयवीए जसेणं च ॥ ७०६१ ॥ निय भुयबलाबले वावगणियकीणासविक्कमेणाहं । तिणगणियसेसराएण पेसिओ तेण तुह पासे ॥ ७०६२ || तुह अस्थि हत्थिगइगामिणीसुया कामिणी सिरोरयणं । सिंगारदेवि नामा कामावासो मयंकमुही ॥ ७०६३ ॥ तेणप्पणो निमित्तं तियसा मग्गविया विवाहेउं । ता वियरसु तस्सब्भत्थणं कुणंतस्स तं कन्नं ॥ ७०६४ || इयरो वि समीहिज्जइ सयणो हुंतो सयाण पुरिसेहिं । किं पुण भुवणच्चब्भुयपरक्कमक्कंतसत्तू सो ॥ ७०६५ ॥ जयवासि रायचूडामणी वि दुद्देतदुट्ठदमणो वि । वंछियवत्थुग्गहणाहिणिवेसप्पत्तकित्ती वि ॥ ७०६६ || विणयप्पणओ पत्थइ तुह तणयं ता तमेव पुन्नपयं । कन्ना उवायणेणं अणुकूलसु ता तमहिमाणिं ॥ ७०६७ || (जुयलं) ससुरो त्ति तुज्झ दाही सो धणकणं किं न देस - नयराइं । तारिसओ जामाऊ लब्भइ बहुपुन्नपसरेहिं ॥ ७०६८ ॥ रूवस्सिणी व सोहग्गिणी वि अइवल्लहा वि तणुतणया । जायइ परोवभोगाय ता इमं होउ देसु सुयं । ७०६९ ।। अह न पयच्छिसि तणयं तस्स तुमं ताहिमाणवसओ सो । करवालबलेण सुयासहियं रज्जं पि तुह हरिही ॥ ७०७० ||
For Private & Personal Use Only
सिरिअणंतजिणचरियं
Jain Education International
www.jainelibrary.org
