________________
५४९
रयणसुंदरकहा को वि गुणी वि कुरूवो को वि सुरूवो वि विमलगुणहीणो । को वि गुणरूवरहिओ को वि सरूवो गुणी किविणो || ७०४५ ॥ को वि पुणो रूवगुणच्चायपरो वि हु परक्कमविहीणो । ता सव्वगुणो जुयलं जा होइ तं सुयाए वरेमि वरं ॥ ७०४६ ॥ अहवा सव्वगुणो वि हु न होइ कन्नाए जुइ मणे इट्ठो । ता जा जीवं पि विडंबिया मए जायइ वराई ॥ ७०४७ ॥ अहवा किं चिंताए पुच्छामि अणंतनाणिणं कमवि । नियकन्ना जोग्गवरं जं सो णाणेण मह कहिही ॥ ७०४८ ॥ इय चिंतिउं गओ खयरनरवईणंतनाणनामस्स । पासे केवलिणो नमिय तक्कामसुणियवक्खाणं ॥ ७०४९ ॥ पत्तावसरं पणमित्तु पुच्छिओ सो सुया वरं रन्ना । तो केवलिणा सययोवओगिणा साहियं एवं ॥ ७०५० ॥ एयद्दिणाओ तीसइमवासरे सूरपुरपुरासन्ने । उज्जाणम्मि सिरधरणिभूसणा कुसुमफलकलिए ॥ ७०५१ ॥ देवंगवत्थदिव्वाभरणेहिं रईयचारुसिंगारो । नवजोव्वणो कुमारो तुह कन्नाए वरो होही ॥ ७०५२ ॥ इय सोउं सो नहयरनरेसरो नमिय केवलिं पत्तो । नियनयरे रज्जसिरं उवभुंजइ पहरिसप्पसरो || ७०५३ ॥ अन्नम्मि दिणे राया विन्नत्तो चेत्तधरनरेणेवं । देव ! दूवारे दूओ हारप्पहराइणो पत्तो ॥ ७०५४ ॥ मुच्चउ सो पुहु ! किं वा नव त्ति ? रायाह मुंच सिग्घं पि । तो सो पवेसिउं दंडिणा सहं रायआणाए ॥ ७०५५ ॥ नमिय नरिंदं उचियासणट्ठिओ विन्नवेउमारद्धो । देवुत्तराए सेणीए गयणवल्लहपुरं अत्थि ॥ ७०५६ ॥ पसरियविमाणसोहा समस्सिया सासया मुणिस्सेणी । परमेरावणजुत्ता जम्मि विरायइ सुरपुरि व्व ॥ ७०५७ ॥
Jain Education International
For Private & Personal Use Only
www.jainelibrary.org
