________________
रयणसुंदरकहा
५४३
तहाहि - भो भो भव्वा ! भावह धुवं अणिच्चो इमो भवविलासो । तं नत्थि वत्थुमिह थोवमवि थिरं जं भुवब्भूयं ॥ ६९६८ ॥ जेण पडणस्सहावो देहो लच्छी वि नस्सरसरूवा । भूरि वायं आउं चलाणुरायाओ रमणीओ ॥ ६९६९ ॥ सुलहो अणिट्ठजोगो दुलहाओ विसिट्ठइट्ठगोट्ठीओ । तरलतरं तारुन्नं विसया विरसावसाणाय ॥ ६९७० ॥ विहुरइ जरा सरीरं रोया पसरति इंति विवईओ । सयणा सकज्जनिट्ठा निच्चं मुहपेच्छओ मच्चू ॥ ६९७१ ॥ तो निव ! किं सच्चवियं तुमए थिरमेरिसे भवसरूवे । जेणज्जवि न पवज्जसि पवज्जं वज्जियावज्जं ॥ ६९७२ ॥ तं सोउं भूमिवई संवेगावेगवग्गुवयणेहिं । पव्वज्जायरणुज्जमजुत्तो विन्नवइ गुरुमेवं ॥ ६९७३ ॥ पहु ! मह महापसाओ विहिओ धम्मोवएसदाणेण । कयरज्जकज्जचित्तो पवज्जं संपवज्जिस्सं ॥ ६९७४ ॥ नवरं पुच्छामि इमं किं मह तणयस्स दुक्खरिंछोली । असमाउल्लसिऊणं अवसरिया पावभीय व्व ॥ ६९७५ ॥ गुरुणा भणियं दुत्थियभवम्मि मुणिदाणलद्धलच्छीए । कारवियं जिणभवणं कंचणमणिरयणरमणीयं ॥ ६९७६ ॥ बिंबपइट्ठावियं जिणेसराण भत्तीए तम्मि कारविया । अट्ठाहिया महम्मि वि दिन्नं अच्चब्भुयं दाणं ॥ ६९७७ ॥ तेणेसो असमसिरीसहिए तुह मंदिरे समुप्पन्नो । सिवसुहमवि पाविस्सइ एय भवम्मि वि सुओ तुज्झ ॥ ६९७८ ॥ | नवरं एगम्मि दिणे रयणिविरामम्मि विगयनिद्दस्स । संजाया पावकरी चिंता दुत्थियनरस्स इमो ॥ ६९७९ ॥
Jain Education International
For Private & Personal Use Only
www.jainelibrary.org
