________________
५३९
रयणसुंदरकहा जय उवयारकरा च्चिय हुंति पवित्तीओ उत्तमाण सया । तुब्भेहिं घणेहिं व तेण सुहरसो वियरिओ अम्ह ॥ ६९१६ ॥ समुवज्जियसुकयाणं अम्हे च्चिय सामिसालपढमयरा । तुम्ह गुरूण व जायं मरणं ते दंसणं जेसिं ॥ ६९१७ ॥ देवी ! देवि च्चिय देवि नूण गंतूण कत्थई जीए । अक्खयदेहा तुब्भे अतक्किया झ त्ति आणीया ॥ ६९१८ ॥ एवं गुणत्थुइपरा कुमरेण जहोच्चिएण ते सव्वे । कुसलोदंताउच्छणपरेणं सम्माणिया दूरं ॥ ६९१९ ॥ तो कुमरागमहरिसीयकडयजणारद्धहट्टसोहम्मि । तियचच्चराइं ठाणा संठियमंचाइमंचम्मि ॥ ६९२० ॥ विजयकडयम्मि कुमरो सिंगारियगुरुकरेणुखंधम्मि । चडिओ कलत्तकलिओ पविसइ रिद्धि-पबंधेण ॥ ६९२१ ॥ (जुयल) पेच्छंतो नाडयपेडयाइं विलसिरपयट्टनट्टाई । अवलोयंतो सेन्नियनियरारद्धे बहुविणोए ॥ ६९२२ ॥ आणंदंतो नियदसणूसुयं लोयमवेण पहम्मि । जद्दरपडकयअत्थाणमंडवे गंतुमुवविट्ठो ॥ ६९२३ ॥ नमिय निविट्ठस्स अमच्चए सुहलोयस्स भत्तिसंतुट्ठो । वत्थाभरणाईहिं सम्माणं कुणइ अ-पमाणं ॥ ६९२४ ॥ तो मंतिप्पमुहेहिं कुमरो परिपुच्छिओ पणमिऊणं । पहु ! कहह सीहतासाइ आगमं तं सवुत्तंतं ॥ ६९२५ ॥ तयणु कुमरेण कहीओ सव्वो वि वइयरो निओ तेसिं । सुय कुमरवसणपरंपरा दुहं ते वि संपत्ता ॥ ६९२६ ॥ जंपंति य कळं पाविऊण पहुणा पुणो सिरी पत्ता । तिव्वतवेणं अहवा लब्भंति नरामरसुहाई ॥ ६९२७ ॥ आह नरनाहपुत्तो जं जेण जया सुहं व दुक्खं वा । पावेयव्वमवस्सं तं सो पावइ भवे तईया ॥ ६९२८ ॥
Jain Education International
For Private & Personal Use Only
www.jainelibrary.org
