________________
सिरिअणंतजिणचरियं . न पयत्तवाहिओ वि हु रायकरो वहइ अद्धछिन्नसिरे । तो संजाओ राया मसिकसिणमुहच्छवी झत्ति ॥ ३०३ ॥ मा साहसं ति मा साहसं ति देवीए जंपमाणाए । धरिउं भुयाए भणिओ वरसु वरं जेण तुट्ठम्हि ॥ ३०४ ॥ भणियं भूमीवइणा वरेण मह कुणसु करयलं पउणं । छित्तुं सिरकमलं तुज्झ पयजुयं जेण पूएमि ॥ ३०५ ॥ देवीए जंपियं वच्छ ! तुह करो करिवियारणपडू वि । छिंदंतो गलनालं थंभिय अचलो मए विहिओ ॥ ३०६ ॥ तुह सत्तपरिक्खत्थं कयाई पच्चुत्तराइ पुत्त ! मए । दिन्नो य तुज्झ पुत्तो निवलक्खणजायसंजुत्तो ॥ ३०७ ॥ भावियभविस्सनियपूयविरमणुप्पन्नसोयविवसाए । नमिय मए तुह पुत्तुप्पत्तिं पुट्ठो विमलनाणी ॥ ३०८ ॥ सो आह सहस्सारामरलोयाओ अणंततेयसुरो । होही पुत्तो चंदावयंसयप्पिययमवराए || ३०९ ॥ तं सोउमहं वद्धाविउं तुमं आगय त्ति तो रन्ना । पणमिय भणियं तं चेव मह हिया सामिणि । न अन्ना ॥ ३१० ॥ इय जंपिऊण कुंकुम-कप्पूरा-गरु-सुयंधकुसुमेहिं । निवकयपूया सहसा तिरोहिया सा महालच्छी ॥ ३११ । तो सामपक्खमेहंधयाररयणीए विज्जविरमम्मि । भुवणं व भवणमंधारियं तयं देवयावगमे || ३१२ ॥ तयणु नरिंदो देवी विइन्नपुत्तप्पसायसंतुट्ठो । माणइ निदं संजायसुहसुहासारसंसित्तो ॥ ३१३ ॥ तो महुरवाणिमागहमंडलउग्गीयजयसरुम्मिस्सं । सोऊण गोसतूरारवं निवो झत्ति पडिबुद्धो ॥ ३१४ ॥ उट्ठइ पल्लंकाओ नमोऽरहंताणमिय पयंपतो । कयपाहाउअ-किच्चो मणिभूसणजणियसिंगारो ॥ ३१५ ॥
Jain Education International
For Private & Personal Use Only
www.jainelibrary.org
