________________
५०४
सिरिअणंतजिणचरियं हियक्खयवत्ताओ रायउलं इंति पउररमणीओ ।। पत्तवरवत्थभूसणसिंगाराओ पुणो जंति ॥ ६४६२ ॥ गच्छंतइंतनच्चिरजणंतरालम्मि झ त्ति गंतूण । सुयमुहमिक्खियवलिउं निवो निविट्ठो पुण सहाए ॥ ६४६३ ॥ पइमंदिरं पि वज्जंततूरगिज्जंतगीयसद्देहिं । बंभंडमंडवो वि हु वहिरिज्जइ ऊसवे तम्मि ॥ ६४६४ ॥ एवं वद्धावणयं कारविय दुवालसे दिणे पत्ते । सम्माणिऊण सव्वं पुणरवि सुहि-सयण-पउरजणं ॥ ६४६५ ॥ सिविणयनियनामाणं गहिऊणं अक्खराणि काई पि । रन्ना नामं सिरिरयणसेहरो इय सुयस्स कयं ॥ ६४६६ ॥ ससि-रविदंसण-छट्ठीजागरण-चंकमण-मुंडमाईयं । किरियं कारिज्जंतो असरिसरिद्धिप्पबंधेण || ६४६७ ॥ परिवद्धिउमारद्धो नवरंभाखंभगब्भसुकुमालो । बालो बीयाचंदो व्व सव्वजणनयणआणंदो ॥ ६४६८ ॥ विज्जागहणावसरे विउसस्स कलाकलावकुसलस्स । पाढत्थमप्पिओ तेण पाढिओ उज्जमपरेणं ॥ ६४६९ ॥ रयणायरो व्व सरियाहिं पुन्नपुरिसो व्व भूरिरिद्धीहिं । सव्वाई पि कलाहिं सिग्घं पि अलंकिओ कुमरो ॥ ६४७० ॥ सयलकलाकुलभवणं कुमरं जायं वियाणिउं विउसो । अप्पइ नरवइणो पणमिऊण एवं पयंपंतो ॥ ६४७१ ॥ सत्थेसु उभयहा वि हु जे हुंता पहु ! ममा वि संदेहा । ते वि हु अवणीया झ ति सुहुममइणा कुमारेण ॥ ६४७२ ॥ नाऊण महीयकलं कुमरं अज्झावओ तहा रन्ना । परिपूइओ धणेणं जह दाया सो वि संवुत्तो ॥ ६४७३ ॥ नायाण वि अब्भासं न मुयइ कुमरो कयाइ वि कलाणं । नासइ अगुणिज्जंती विज्ज त्ति जओ सुई सत्थे ॥ ६४७४ ॥
Jain Education International
For Private & Personal Use Only
www.jainelibrary.org
