________________
रयणसुंदरकहा
५०१ समलंकरिडं राया रयणाभरणेहिं फुरियकिरणेहिं ।। परिहाविओ य देवंगदेवदूसाइवत्थाइं ॥ ६४२३ ॥ आरोविऊणरणज्झणिरकिंकिणीजालमणिविमाणम्मि । दाऊण सहायत्ते सुप्पहअमरं सपरिवारं ॥ ६४२४ ॥ भणियं च पहु ! तए निरुवयारिजणकयकहाए बंधम्मि । अम्हे वि सुमरणिज्जाओ तयणु ताओ निवो भणइ ॥ ६४२५ ॥ जइ निरुवयारिणीओ तुब्भे ता को महोवयारपरो । न सरिज्जिस्सह कह वा गुणनद्धाओ वि मणे मज्झ ॥ ६४२६ ॥ तुम्हाण मणे जम्मि ठाणे निवसामि तन्न अत्तस्स । दायव्वं ति पयंपिय झड ति चलिओ महीनाहो ॥ ६४२७ ॥ मणपवण-नयणजइणा जवेण सिग्घं पि गयणमग्गेण । पत्तो इह सहस च्चिय दितो तुम्हाण संतोसं ॥ ६४२८ ॥ नाम ति तए जो पहुगमणागमणाण वईयरो पुट्ठो । सो तुह कहिओ त्ति पयंपियं सुरो मणे मल्लीणो ॥ ६४२९ ।। तो मंति-मंडलेसरसामंता पुरिपहाणपुरिसा य । सुय पहु-अच्छेरयकर-चरिया विम्हियमणा बिंति ॥ ६४३० ॥ अहह महच्छरियमहो जं रज्जाइं वि उज्झिउं सामी ! । खयरो व्व मणिविमाणेण जोइणीए सह पउत्तो ॥ ६४३१ ॥ जं पुण तिणगणियसजीविएण बलाओ मोइया बाला । सुमरंताण वि तं कायराण परिकंपए हिययं ॥ ६४३२ ॥ वोत्तुं पि तं न तीरइ भएण जं निसिमसाणमज्झम्मि । भूयपिसायाईणं विद्धंसो विरईओ पहुणो ॥ ६४३३ ॥ जं पुण भीसणखेत्ताहिवेण गिलिएण दारिओ उयरं । निक्खंतं तं सोउं न कस्स चित्तं चमक्केइ ॥ ६४३४ ॥ एयं तु तिजयरज्जाहिसेयसमहियसमाहिसंजणयं । जं जोगसिद्धिजोईसरीहिं दिन्नो सुओ पहुणो ॥ ६४३५ ॥
Jain Education International
For Private & Personal Use Only
www.jainelibrary.org
