________________
४९८
सिरिअणंतजिणचरियं
पत्ता रायसमीवे, भामियवत्थंचलं समुल्लवइ । तुह साहसेण जाया पहु ! मह मंतस्स संसिद्धी ॥ ६३८४ ॥ न कुणंतो जइ तं पुरिसरयण ! मह मंतसाहणसाहेज्जं । ना मारिज्जंती हं कयत्थिर्ड खेत्तवालेण ॥ ६३८५ ॥ मह सामि ! दुवालसवरिसपुव्वसेवाए कट्ठमज्जेव । पडिवन्नपालएणं तुमए च्चिय सहलयं नीयं ॥ ६३८६ ॥ अंगीकयनिव्वहणुच्छूढजसो एत्थ देव ! तं चेव । वीरवरो वि पविसइ जन्न अवंतीमसाणम्मि ॥ ६३८७ ॥ ता नंदाचंदक्कं पावसु तं सव्वभूमिरज्जं पि । नरमाणिक्क ! पवद्धउ पुत्त-पुत्तेहिं तुह वंसो ॥ ६३८८ ॥ मज्झ वि जाया सत्ती वंछियवत्थुप्पयाणविसयम्मि । जाणामि तं अपुत्तं तुह साहससिद्धमंतेण ॥ ६३८९ ॥ पढमं कज्जं कज्जं गुरुणी आणाए होइ देव ! जओ । वद्धावेमो गुरुणिं समंतसिद्धीए ता चलह ॥ ६३९० ॥ खणमित्तं माणेउं निद्दासोक्खं तओ पभायम्मि । जोईसरीए मिलिउं गच्छिज्जह नाह ! नियनयरे ॥ ६३९१ ॥ तो तीए जुओ राया रयणविमाणेण तग्गिहे पत्तो । सुत्तो य जामिणीए सेसे पल्लंकमारुहिडं ॥ ६३९२ ॥ सुरमंदिरवज्जिरगोससूयगाउज्जसद्दसंबुद्धो । पाभाउयकिच्चाई, कारविओ जोगसिद्धीए ॥ ६३९३ ॥ तो सा नियगुरुणीजोग्गवत्थलंकारअक्खवत्ताई । गहिऊण पुरो काउं निवई तम्मंदिरं पत्ता ॥ ६३९४ ॥ दिट्ठा य तम्मि मणि-कणय-दंड-दोलाविसालसेज्जगया । विज्जुपरमाणुगणनिम्मिय व्व नवकणयगोरंगी ॥ ६३९५ ॥ रयणाभरणपहाभरदुनिरिक्खासरयरविकरालि व्व । विप्फुरियसुतारुज्जलचंदमुही कोमुइनिसि व्व ॥ ६३९६ ॥
Jain Education International
For Private & Personal Use Only
www.jainelibrary.org
