________________
४९४
एत्यंतरे नरिंदो मंडलयसमीवकयपरिब्भमणो । पेच्छइ उच्छलिउं जुज्झियाइं नरसिरकरंकाई ॥ ६३३२ ॥ रक्खस-भूय-पेय- पिसाय - वेयालवंदमइघोरं । नियइ दिसाणननहाओ महिं चउब्भिदियं इंतं ।। ६३३३ || मज्जारिण खरीणं करहीणं सेरहीण य अयाणं । रूवेहिं साइणीओ पेच्छइ तरुगुरुसरीराओ ।। ६३३४ ॥ तं दठ्ठे दाहिणकरउब्भामियतिव्वधार करवालो । वामकरुल्लासियखग्गधेणुओ पसरिओ राया ॥ ६३३५ ॥ हणिय विहाss निबिडट्ठिपंजरं नरकरंकविसरस्स । भिंदइ वेयालवणं ताडियफोडयकरोडीओ ॥ ६३३६ ॥ पहणइ पेए दारेइ रक्खसे भेसए य भूओहं । पायपहारेहिं दड त्ति पाइए सो पिसाए वि ।। ६३३७ ॥ काओ वि असिधेणू दारइ काओ वि खग्गघाएहिं । मज्जारीए पमुहाओ काओ वि दरमलइ पाएहिं ॥ ६३३८ ॥ विसहरकुलं व गरुडाउ सीहसावयाउ हरिणजूहं च । सव्वं पिट्ठविंदं तं नठ्ठे नरवइभयाओ ॥ ६३३९ ॥ एत्थंतरम्मि घणगणपडंततडितडयडुब्भडायारं । हसिरो महिमुब्भंदियविणिग्गओ घोरखेत्तवई ॥ ६३४० ॥ भमरउलकालनियकायकंतिभरतिमिरपूरपसरेण । अप्पं व तिरोहंतो अदिस्स उवसग्गकरणत्थं ॥ ६३४९ ॥ सामलसप्पुद्धनिबद्धअइपिंगविहरसंभारो । चउपासधूमवेढियसिररईयज्जलिरजलणो व्व ॥ ६३४२ ॥ एक्केण करेणाहय उड्डामरडमरुयस्सरभरेण । पयडंतो भुवणक्खयहरविरईय अट्टहासं च ॥ ६३४३ ॥ चीएणमुव्वहंतो रुहिरारुणकत्तियं कसिणकाओ । संझारायारुणियं बीया चंदं व नहमग्गो ॥ ६३४४ ॥
Jain Education International
सिरिअणंतजिणचरियं
For Private & Personal Use Only
www.jainelibrary.org
