________________
४९२
सिरिअणंतजिणचरियं
अद्धत्थंगय-रवि-समयपिहियगोउरनिरुद्धसंचारं । नयरिं रयणविमाणेण राइणा सह विलंघेउं ॥ ६३०६ ॥ मत्ता सिप्पनई नियडनहपहप्पत्तकलसकेउस्स । हारे दारुणदाढक्खजक्ख-भवणस्स भीमम्मि || ६३०७ ।। नियइ गुरुतरमसाणं दुसहसिवा विसरविहियफेक्कारं । अइघोरघोसघुग्घुइरघूयसंघायकयकंपं ॥ ६३०८ ॥ जं पज्जलिरचियाचयमज्झं ताणेयमडयसंघायं । वज्जानलपज्जलमाणनारयं नरयठाणं व ॥ ६३०९ ॥ हयचोररुहिरसित्तं, विकिन्ननरदंतमोत्तियचउक्कं । जं सिरकमलप्पयर, जममिव अत्थाणठाणं व ॥ ६३१० ॥ आबद्धमंडलीया, पाउं रुहिरासवं सिरफलाई । भक्खंता वेयाला घोरसरं जत्थ गाइंति ॥ ६३११ ॥ सिंगारिणो पिसाया घुसिणरसेणेव जम्मि रुहिरेण । मंडंति सामथेरी करंकरूवाओ भज्जाओ ॥ ६३१२ ॥ जत्थग्गिदाहसामे विज्झाय चियाण छारपुंजभरो । नज्जइ लवणसमुद्दे, पडलट्ठियफेण बिंदं व ॥ ६३१३ ॥ जं असिवाण निवासो सूणासाला अनायकारीणं । संकेयठाणं साइणीण भूयाण भोयगिहं ॥ ६३१४ ॥ उस्सूण पक्कमयनरकरंकसलवलिरकिमिकुलच्छलओ । जं सयमवि परिकंपइ बहुरक्खसभूयभीयं व ॥ ६३१५ ॥ पूयसडहडियमडयुच्छलंतबहुमच्छियाभरेहिं जहिं । तिमिरं व तरंगिज्जइ जलिरचिया धूममासलियं ॥ ६३१६ ॥ पसरियकवालमालं सिवासियं घोरविसहरं विउलं । तिणयण-सरीरमिव जलखिज्जइ सइ वि भूइसियं ॥ ६३१७ ॥ दुस्संचारे मयनरकरंककरचरणसीसकेसेहिं । तम्मि विमाणं मोत्तुं पविसइ सा रायसंजुत्ता || ६३१८ ॥
Jain Education International
For Private & Personal Use Only
www.jainelibrary.org
