________________
गिहिथम्मे चंदसेणकहा सोयामणिप्पहावेढियं व अरुणोरुकंतिकलियं व ।। जं सव्वत्तो तवणीयसालपहसरपरिक्खित्तं ॥ २६५ ॥ . एगोऽत्थि महादोसो तम्मि पुरे सव्वगुणगरिठे वि ।। जं अट्ठावयकलिओ दुव्वन्नजुओ य वसइ जणो || २६६ ॥ तं परिपालइ राया नाया नीसेसनीइसत्थस्स । चंदावयंसओ नाम कामरूवो कणयगोरो ॥ २६७ ॥ जो जंपतो रत्ताहरप्पहं धवलदंतकंतिं च । पयडइ जणाणुरायं जसपब्भारं च अणवरयं ॥ २६८ ॥ जस्स करक्कंतारोसमंतठाणट्ठिय च्चिय विवक्खा । अग्गि मुयंति रविकरपहया अचला वि रविकंता ॥ २६९ ॥ तस्संतेउरसारा हारावलि रइयरम्मसिंगारा । वयणविणिज्जयचंदा समत्थि चंदावली कंता ॥ २७० ॥ सामा वि सुतारा वि य सयलकलाकलियरायकंता वि । अखरकरा वि अदोसा जं देवी तं महच्छरियं ॥ २७१ ॥ जीए परोप्परपरवुड्ढिपेच्छणुच्छलियमच्छरभर व्व । अन्नोन्नपीडणपरा सिहिणो सामाणणा जाया ॥ २७२ ॥ पंचविहं विसयसुहं उव जंतस्स तीए सह जंति । रन्नो अन्नाया एव दिवसा दिवसाहिवमहस्स ॥ २७३ ॥ धणयसमरिद्धिबंधुरजणजणवयनिवहसंकुलं रज्जं । कंचण-रयणाभरणेहिं पूरिया भूरिभंडारा || २७४ ॥ निस्सेसधन्नपुन्ना कोट्ठागारा य गयवरा मत्ता । उत्तुंगा य तुरंगा रहा य रणझणिरकिंकिणिया ॥ २७५ ॥ उन्भूयभत्तिसारा सामंता मंतिणो य मंडलिया । अच्चंतं अणुरत्तो अंतेउरतरुणिनियरो य ॥ २७६ ॥ निव्वंसत्तं नीओ सत्तुगणो सुहिजणो समुद्धरिओ । सयणा वि समग्गा वि हु पडिपुन्नमणोरहा विहिया ॥ २७७ ॥
Jain Education International
For Private & Personal Use Only
www.jainelibrary.org
