________________
सिरिअणंतजिणचरियं रयणीतिमिरं पिव तेणमवहियं मज्झ मोहतमजालं । पवियसियं विव सहसा सुहपरिणइकुमुयसंडंपि ॥ २५३ ।। परिपीणियं च पुन्नप्पयईए जलं चओरचक्कं व । तस्सुल्लासेण अहं अलंकिओ गयणमग्गो व्व ॥ २५४ ॥ नीओ य पवित्थारं मह बंधुरधम्मदुद्धसिंधुवई । मउलीकयं च तेणं तह पावप्पयइकमलवणं ॥ २५५ ॥ पत्ते वि साहुधम्मे अंगीकाउं तरामि गिहिधम्मं । सिरबुक्कं वि उक्खिवइ दुग्गओ रोहणे वि गओ ॥ २५६ ॥ ता काऊण पसायं इण्हिमसत्तस्स सव्वविरईए । मह देह देसविरई सत्तिसमो धिप्पए भारो ॥ २५७ ॥ तो गुरुणासंवेगावेगवसुल्लसियसुद्धभावस्स । दिन्नो रन्नो सावयधम्मो सम्मत्तसंजुत्तो ॥ २५८ ॥ सुस्सावयवयविंदं पीऊसं पिव तिसाभिभूएण ।। गहियं बहुमाणेणं रयणनिहाणं व रोरेण ॥ २५९ ॥ तग्गहणाओ नरिंदो दूरं परिओसपूरिओ जाओ । लाहो सामन्नो वि हु सो य न किं सिवेक्कफलो ? || २६० ॥ धम्मफललाहलालसचित्तो विणएण पुच्छए गुरुणो । पहु । जस्स देसविरई जाया मोक्खाय तं कहह ॥ २६१ ॥ अह आह साहुनाहो नरिंद ! एक्कग्गमाणसो होउं । गिहिधम्मपालणफले सुणसु कहं चंदसेणस्स ॥ २६२ ॥ ॥ छ । (गिहिधम्मे चंदसेणकहा) दिसि दिसि निसिससिपहभरिय वरमणिभवणसलिलसमियरयं । चंदउरं नाम पुरं समत्थिरन्नसुदेसरमणियं ॥ २६३ ॥ चउपासघुसिणरसरंजियं व सिंदूरपूरभरियं व । परिभमियअसोयवणं व फुरियथिरसंज्झरायं व ॥ २६४ ॥
Jain Education International
For Private & Personal Use Only
www.jainelibrary.org
