________________
४६६
अनिलुल्लसंतसरजलकल्लोलावलिचलं आउं ।। ५९७२ ।। नवजलहरसिहरंतर फुरंततडिदंडविब्भमा भोगा । करिकन्नतालतरला नराण नवजोव्वणारंभा ॥ ५९७३ ।। सारयसमयसमुब्भव अब्भयपडलं व ल्हसइ लायन्नं । अइनेहबद्धमित्तो व्व नो समीवं मुयइ मच्चू ॥ ५९७४ ॥ अणुरत्तभावियाओ वसइ सन्निहियाओ चैव विवसाओ । गोट्ठिकए मिलिया इव न सव्व रोया चयंति तणुं ॥ ५९७५ ।। कुमईओ व सुलहाओ सत्ताण सया अणिट्ठगोट्ठीओ । किंतु अइव दुलहाओ असंसयं इट्ठगोट्ठीओ ॥ ५९७६ ।। ता भो एवं रूवं भवस्सरूवं विभाविउं भवह । तम्मि प्फुरिय वि राया अणुरायपरा पुणो धम्मे ।। ५९७७ | हुति नराण न नूणं नेरइयकयत्थाओ धम्मेण । तिरियत्तुप्पत्ती वि य न हवइ धम्मप्पभावेण ॥ ५९७८ ॥ धम्मो देइ नरत्ते, हरि - चक्कि - जिणेसरस्सिरीओ वि । धम्मो चउव्विहाण वि, वियरइ अमराण सामित्तं ।। ५९७९ ।। धम्माओ होइ सासयसिवपयसुहसंगमो वि अक्खेवा । अत्थि न कत्थइ तं जं न हवइ धम्माओ कल्लाणं ।। ५९८० ।।
सिरिअणंतजिणचरियं
सो दुविगप्पो जइ गिहि-भेया खंताइदसविहो पढमो । बारसहा बीओ थूलं पाणिवहविरमणा पढमं ।। ५९८१ ॥ तम्मूलं सम्मत्तं तं सुद्धमरायदोसदेवेण । निग्गंथेण गुरुणा, जीवाइयतत्तनवमेण ।। ५९८२ ॥ ता अंगीकरह इमं देव- गुरु तत्त- सद्दहणं सुद्धं । साहूण सावगाण य, धम्मो जह सहलयं जाइ ॥ ५९८३ ॥ एवं केवलिकहियं, सोउं सद्धम्मदेसणं जाया । धम्माभिमुही परिसा, पहरिसओ पुलयकलियंगी ॥ ५९८४ ॥
Jain Education International
For Private & Personal Use Only
www.jainelibrary.org
