________________
४५९
भावणाधम्मेसिंगारमउडकहा रच्छासु सोहियासुं छडयाकुंकुमरसेण दिज्जंति । भमरउलरोलमुहलो पक्खिप्पइ पुप्फपयरो य ॥ ५८८२ ॥ विहिया य हट्टसोहा पडिजद्दरमेहडंबराईहिं ।। वत्थेहिं विचित्तेहिं सव्वासु वि रायरच्छासु ॥ ५८८३ ॥ चच्चर-चउक्कतियचउमुहाइठाणेसु विरईयमेंठा । अनिलुल्लासियधयरणज्झणंतघणकिंकिणिकलावा ॥ ५८८४ ॥ सव्वम्मि वि नयरम्मि सव्वेसु वि मंदिरढुवारेसु । बधाई तोरणाई रईया रंगावलीओ वि ॥ ५८८५ ॥ सव्वत्तो च्चिय सुसरं मंजुलगुंजंतमद्दलुद्दामं । रायचरियाणुविद्धं गिज्जइ गेयं मयच्छीहिं ॥ ५८८६ ॥ अक्खयपत्तट्ठावियसव्वुत्तमपमुहसूराण कराओ । पुररमणीओ गंतुं सहाए वद्धावयंति निवं ॥ ५८८७ ॥ रायप्पसायसंपत्तवत्थ-आभरणभूसियंगीओ । ताओ कुंकमथवयग्गभासिभालाओ गच्छंति ॥ ५८८८ ॥ निव-मंडलीय-सामंत-मंति-अंतेउरीओ सव्वाओ । वज्जिरवद्धावणयच्छंदपयट्टतनट्टाओ ॥ ५८८९ ॥ नियरम्मरूवसिंगारगारवाहरियरइसिरीओ ।। वद्धावति निवई सहाए सह निययनाहेहिं ॥ ५८९० ॥ ते बिंति पणइपणयं काउं संपत्तपुत्तजम्मेण । वद्धाविज्जसि तं पहु ! अम्हासा पूरणपरेण ॥ ५८९१ ॥ इय भणिय रयण-भूसण-वत्थेहिमलंकरंति ते निवई । राया वि तेसि वियरइ हय-गय-वस्थाभरणजायं ॥ ५८९२ ॥ किविण-वणीमग-मागह-चारण-वंदियण-दीण-दुत्थाण । वंछा विच्छयकराई देइ दाणाई परितुट्ठो ॥ ५८९३ ॥ पइमंदिरं पि वज्जिरनिरवज्जाउज्ज-गीयसद्देण । आणंदिज्जइ नच्चिरविलासिणी नट्टमिक्खंतो ॥ ५८९४ ॥
Jain Education International
For Private & Personal Use Only
www.jainelibrary.org
