________________
४४९
तवोवरिचंदकंतकहाणयं गुणरयणवच्छरम्मि सोलस मासा हवंति तवचरणे । एगंतरोववासा पढमे मासम्मि कायव्वा ॥ ५७५५ ॥ ठायव्वं उक्कुडुयासणेण दिवसे निसाए पुण निच्चं । वीस ऊ मणिएण तहा होयव्वमवाउडेणं च ॥ ५७५६ ॥ बीयाइसु मासेसुं कज्जा एगुत्तराए वुड्ढीए । जा सोलसमे सोलस उववासा हुंति मासम्मि ॥ ५७५७ ॥ जं पढमम्मि मासे तमणुट्ठाणं समग्गमासेसु । पंचसयाई दिणाणं वीसूणाई इमम्मि तवे ॥ ५७५८ ॥ अंगाणमुवंगाण य चिइवंदण पंच मंगलाईण । उवहाणाई जहाविहि हवंति तह तस्स कहियाइं ॥ ५७५९ ॥ तं सोऊण तवस्सी वसंतदेवो विसुद्धसद्धाए । कुणइ तवच्चरणाई गुरुआणा पालणुज्जुत्तो ॥ ५७६० ॥ तो सो तिव्वयरतवायरणाउ य अट्ठि-चम्ममेत्ततणू । पालइ सामन्नमणन्नसरिससमुल्लसिरसंवेगो ॥ ५७६१ ॥ अवरेण वि मुणि-समणीजणेण नियसत्तिसरिसमायरियं । तव-चरणाणुट्ठाणं सिद्धंतत्तप्पयारेणं ॥ ५७६२ ॥ तह गाढयरो विहिओ वसंतराएण साहुणा वि तवो । वइणी वसंतलच्छीए वि सविसेसो तवो विहिओ || ५७६३ ॥ बहुवरिसणलियवओ साहुवसंतो वसंतराओ य । दो वि कय अंतकिरिया मरिय गया अच्चुए कप्पे ॥ ५७६४ अज्जाओ वसंतसिरी वसंतलच्छी उ आउअंतम्मि । अंताराहण पुव्वं तम्मि वि पत्ताओ सुरलोए ॥ ५७६५ ॥ साहू वसंतदेवो गयणंगणगमणलद्धिकयगमणो । सोहागपुरे पत्तो समोसढो अंबयवणम्मि ॥ ५७६६ ॥ नाऊण मित्तसाहुं, पत्तं सोहग्गसुंदरो राया । रिद्धीए समागंतुं तं नमिय पुरो समुवविट्ठो ॥ ५७६७ ॥
Jain Education International
For Private & Personal Use Only
www.jainelibrary.org
