________________
४४२
सिरिअणंतजिणचरियं नियवयमईए जाओ पिओ वयबुद्धीए कुसुमिव दूरं । तब्भावतरूफलिओ जणणी-भज्जा वयमईए ॥ ५६६९ ॥ जाया तस्स समाही सयलकुडुंबव्वयाहिलासेण । नियमाणुसाणमहवेगचित्तया कस्स न सुहाय ? ॥ ५६७० ॥ कहिओ पणमिय पिउणो जणणी दईयाण वयपरीणामो । तो सो तुट्ठो हरिसाय कस्स नो धम्मि जणबुद्धी ॥ ५६७१ ॥ तो निवइ-तंतवालं वत्थाहरणेहिं पूयए सेट्ठी । सम्माणिज्जइ अन्नो वि किन्न उवयारि रायनरो ? ॥ ५६७२ ॥ रायनिमित्तं दाउं बहुवत्थाभरण-अंगरायाई । तमणुव्वईय विसज्जिय वसंतदेवो गिहे पत्तो ॥ ५६७३ ॥ काउं कयाणगाईण विक्कयं जायभूरिधणलाहो । जा चिट्ठइ ता सूरी समागओ तत्थ मयमहणो ॥ ५६७४ ॥ तीरायरसियहियओ जो अजडासयनिबद्धबुद्धी वि । दूरज्जियपज्जुन्नो संगहियमहत्थसत्थो वि ॥ ५६७५ ॥ समवसरिओ विसाले वियसियबउलाभिहाणउज्जाणे । तं नाऊणं सेट्ठी संतुट्ठो पुत्तसंजुत्तो ॥ ५६७६ ॥ तो विरईय सिंगारो आरुहिय हयं सुयाइजणजुत्तो । पत्तो गुरुनमणत्थं, वसंतराओ वि सकुडुबो || ५६७७ ॥ मोत्तूण वाहणाई पंचविहाभिगमविहिविहाणेण । अभिवंदिउं मुणिंदो, तिपयाहिणपुव्वयं तेहिं ॥ ५६७८ ॥ सूरी वि दुरुत्तरभवसमुद्दनिवडंतजंतुजायस्स । तारणतरितुल्लंताण देइ सद्धम्मलाहासिं ॥ ५६७९ ॥ अभिवंदिय मुणिविंदा मुणिंदचरणारबिंदजुयपुरओ । उवविट्ठा पहुणा वि हु वागरिया देसणा ताण ॥ ५६८० ॥ तीए प्पयासिया नरय-जायणा तिरिय-वेयणा कहिया । पयडीकओ नरत्ते, रोगाइअवायसमवाओ ॥ ५६८१ ॥
Jain Education International
For Private & Personal Use Only
www.jainelibrary.org
