________________
१७
पढमपत्थावो इच्चाइवेयणं सहिय वेइयासुहविवागकम्मभरा । थोवठियअसायवसा सत्ता तिरियत्तणमुर्विति ॥ १९१ ॥ मित्ताइवंचणेणं माया-पेसुन्नपयडणेणं च । धण-गिह-सयणाईणं मोहेणय य जंति तिरियत्ते ॥ १९२ ॥ तत्थ वि दहणंकण-दोह-वाह-मंसासिवह-विरोहेहिं । जंति क्खयं वराया दव-सीय-महायवेहिं च ॥ १९३ ॥ तत्थ ट्ठिया वि के वि हु रोद्दज्झाणज्जिएहिं पावेहिं । पुणरुतं सव्वासु वि भमंति नेरइयपुढवीसु ॥ १९४ ॥ अवरे उ कुकम्मभरं निज्जरिउमकामनिज्जराए बहुं । सच्छा अप्पकसाया समभावा इंति मणुयत्ते ॥ १९५ ॥ तत्थ वि गुरुतरदारिद्ददूमिया दुसहरोगअक्कंता । दुत्थावत्थं पत्ता सत्ता कटं चिय सहति ॥ १९६ ॥ अभिहम्मंति रिऊहिं पराहविज्जति ईसरनरेहिं । संगणेहि परिहरिजंति माणिणो वि हु अकयसुकया ॥ १९७ ॥ नारय-तिरियगईसुं के वि हु रोद्दऽट्टज्झाणपत्तासु । उप्पज्जति वराया दुकम्मगलत्थिया संता ॥ १९८ ॥ अवरे पुणोणुकंपा-बालतव-च्चरण-दाणपत्तेण । संजायंते जीवा सामन्नसुरेसु पुन्नेण ॥ १९९ ॥ तत्थ वि पररमणीरायजायतयलाभविरहविहुरंगा पावंति महादाहं, उल्लसियविसायवेयल्ला || २०० ॥ पररयणरासिलुद्धा तह असहंता परप्पहुत्तस्स । कुव्वंति महाईसं दटुं च पियं परासत्तं ॥ २०१ ॥ आणाखंडणपरिकुवियसक्कपम्मुक्कवज्जघायहया । भाडगया चणगा इव दाहं विसहंति छम्मासे || २०२ ॥ ईसाणंता मोहेण के वि एगिदियत्तणं जंति । अट्टज्झाणेणऽन्ने उ इंति तेरिच्छिगब्भम्मि ॥ २०३ ॥
Jain Education International
For Private & Personal Use Only
www.jainelibrary.org
