________________
४१८
सिरिअणंतजिणचरियं इय चउसु वि संसारुब्भवासु न गईसु सोक्खलेसं पि । पावइ पाणी मुत्तुं पंचमगइमीसिपब्भारं ॥ ५३५७ ॥ देव-गुरु-धम्म-तत्तेहिं तं पि पावंति पाणिणो भव्वा । सत्था वि मच्छरावज्ज, भीरुणो दाणचित्ता य ॥ ५३५८ ॥ तत्थ गयरायरोसो अणंतनाणी परोवयारी य ।। देवो पवज्जियव्वो अरिहंतो भव्वभवहारी ॥ ५३५९ ॥ जो एय गुणविहूणो सो सयमवि मज्जिरो भवसमुद्दे । कह तारिही समस्सियसत्ते ता चयह तं देवं ॥ ५३६० ॥ ससमयपरसमयन्नू पंचविहायारविरयमणवित्ती । निग्गंथो गीयत्थो, संतो दंतो गुरूगज्झो ॥ ५३६१ ॥
जे उ महारंभपरिग्गहा य, कोहाइकलुसया कलिया । सिस्साण गुरूण य नत्थि अतरंता न ते गुरुणो ॥ ५३६२ ॥ पाणिवहालिय-अदत्त-मेहुणाणं परिग्गहजुयाणं । परिहारो कारइ जम्मि सो सिवं साहए धम्मो ॥ ५३६३ ॥ जम्मि पुणो एयाणं पालिज्जइ नेगम वि अहम्मे सो । कुगइपहपत्थियाणं, पाणीणं सुत्थसत्थाहो ॥ ५३६४ ॥ तत्तं जीवाजीवाइ, नवविहं केवलीहिमक्खायं । जं पुण कुतित्थियुत्तं तमतत्तमसेसमविसेसं ॥ ५३६५ ॥ देव-गुरु-धम्म-तत्त-स्थिरत्तणे होइ सुद्धसम्मत्तं । बीयं च धम्म-कप्पडुमस्स सुरसिद्धिसुहफलयं ॥ ५३६६ ॥ एयं अपत्तपुव्वं, पायं पाणीण इह भवावत्ते । अप्पभवो भववासो, हुतो जमिमेण पत्तेण ॥ ५३६७ ॥ एयमपुव्वं भव्वा जइ, जइ-धम्मं कुणंति दसहा वि । तं तब्भवे वि मोक्खं, पावंति पणठ्ठट्ठकम्मा ॥ ५३६८ ।। अतरंता सामन्नं, काउं कमदिन्नसिद्धिसंबंधं । गिण्हंति देसविरई, विसुद्धसम्मत्तसंजुत्तं ॥ ५३६९ ॥
Jain Education International
For Private & Personal Use Only
www.jainelibrary.org
