________________
३९८
सिरिअणंतजिणचरियं जलसेयतालयंटमनिलाइदाणेण सो कओ सत्थो । अकयदइयाकलंका रोवणं दूमिय-मणो रुयइ ॥ ५०९७ ॥ हा दइए ! निम्मलसीलसंगयाए वि दुस्सहं अयसं । दुस्सीलया सरूवं, दाउं तुह किं विही लहिही ? || ५०९८ ॥ हा पोढि ! पत्तपणए हा ! विरईयपूयणिज्जजणविणए । हा हत्थिगमणि! हा रमणरमणि ! तं कत्थ पेच्छिस्सं ? ॥ ५०९९ ॥ सुन्नं सयणं भवणं, भयाणयं विसहरोवमा विसया । सिंगारा अंगार व्व दाहया तं विणा दईए ॥ ५१०० ॥ दीहदरिसत्तणं दीहरच्छि ! तुह चेव नूण निव्वडियं । मिलिउं गुरूण गच्छसु ईय वईया जं पमाणीए ॥ ५१०१ ॥ जइ जह दुस्सह तुह विरहवज्जपहराहओ विवज्जामि । निक्कित्तिमो सिणेहो, निव्वडइ न अन्नहा ता मे ॥ ५१०२ ॥ इय परिदेवणपुव्वं, पलवंतो सेट्ठिणो सुओ भणिओ । समइक्कंतं वत्थु न वच्छ ! सोयंति गुणिणो जं ॥ ५१०३ ॥ गतं मृतमतिक्रान्तं शोचन्ति विपश्चितः । गतं गतमतिक्रान्तमतिक्रान्तं मृतं मृतम् ॥ ५१०४ ॥ ता तीए पिइहराइठाणेसु विसोहिऊण तं वच्छ । । खामिय आणिस्सामो, जमजुत्तं विहियअम्हेहिं ॥ ५१०५ ॥ तुह पक्खिणा इहागमणमघडमाणं ति कलिय अम्हेहिं । निस्सारिया वराई, वहुया रोसारुणच्छीहिं ॥ ५१०६ ॥ ता एक्कमकयपुव्वं, अवराहं खमसु पुत्त ! अम्हमिमं । जं दुप्पडियाराई हवंति अम्मा-पिऊणत्थ ॥ ५१०७ ॥ एवं सो बहुसो वारिओ वि विरमइ न रोईयव्वाओ । न जिमइ न रमइ न सुयइ झायइ मंतं व नियदईयं ॥ ५१०८ ॥ असुहं हियए अरई सरीरए मंदिरम्मि रणरणओ । उव्वेओ नयरीए वि जाओ से पिययमा विरहे ॥ ५१०९ ॥
Jain Education International
For Private & Personal Use Only
www.jainelibrary.org
