________________
पढमपत्थावो
विरहानलतत्तंगुव्वत्तण-परियत्तणेहिं बालाए । उल्लसइ मम्मररवो नवकमलदलालिसत्थरए ॥ १४२ ॥ सिसिरोवयारपरपासवत्तिणं सहियणं दहइ दूरं । गिम्हसिरि व्व पसरिया लूयानलउण्हसासेहिं ॥ १४३ ॥ देहुण्हाए तीए तड त्ति फुटुंति मोत्तियाईणि । रयणाई फलाई पिव एरंडदुमस्स तावेण ॥ १४४ ॥ निद्दा-छुहामई-धिइ-लज्जा-लीलाओ सइ ठियाओ वि । दाहभयुत्तत्थाउ व न तीए देहे निलीयंती ॥ १४५ ॥ एयमवत्थं तं पेच्छिऊण कमलस्सिरीए देवीए । कहिओ सहीहि गंतुं कुमरी वेयल्लवुत्तंतो ॥ १४६ ॥ तं सोउमाह देवी किमजुत्तं ? जं महानिवसुओ सो । कुमरी वि कुमारी ता वीवाहिज्जंतु एयाइं ॥ १४७ ॥ इय जंपिय देवीए वुत्तंतो साहिओ महीवइणो । तेणावि अमच्चाणं ते वि पयंपंति जुतं ति ॥ १४८ ॥ तो देव ! अहं तुम्हक्कमंतिए पेसिओ नियनिवेण । तुम्ह तणयस्स कन्नं दाउं परिवज्जिय विलंबं ॥ १४९ ॥ ता कयमहापसाया पेसह कुमरं नरिंदतणयाए । परिणयणत्थं ति पयंपिऊण दूओ ठिओ मोणे ॥ १५० ॥ तो सजलजलहरागज्जियजयणासद्देण जंपए राया । जुत्तो च्चिय दूय ! इमो कुमार-कुमरीण संबंधो ॥ १५१ ॥ इय जंपिऊण नियवामपासठियकुमरमाह नरनाहो । गंतुं वच्छ ! नरेसरकन्नं वीवाहिउँ एहि ॥ १५२ ॥ इय जणयाणं सीसे समुव्वहंतेण तेण कुमरेण ।। पणमिय भणियं मह ताय ! तुम्ह आणा पमाणंति ॥ १५३ ॥ तुट्टेण तओ रन्ना रयणाभरणेहिं अंगलग्गेहिं । वत्थेहि य विविहेहिं विहिओ दूयस्स सम्माणो || १५४ ॥
Jain Education International
For Private & Personal Use Only
www.jainelibrary.org
