________________
३७७
तवोवरिचंदकंतकहा ठाणट्ठिए वि पेच्छइ, गिरि-तरु-दीवाइणो समुहमिते । पायं कट्ठावडिया ण होइ दिट्ठी विवज्जासो ॥ ४८२६ ॥ इय गरुय-वेग-गच्छंतजाणवत्तम्मि सो समारूढो । वल्लहपियाविओगुव्विग्गमणो चिंतिउं लग्गो ॥ ४८२७ ।। किं कज्जं सहसतक्कियजलनिहिजत्ताए पेसिओ पिउणा । । कहियं न किं पि पुव्वं, जाणामि न कारणमिहत्थे ॥ ४८२८ ॥ जणयाएसो चेव य, कायव्वो एत्थ किं वियप्पेण । किं तु न जं दइयाए कहियं तं दूमइ मणो मे ॥ ४८२९ ॥ जाणइ न सा वराई, जमहं कज्ज-च्छलेण वाहरिओ । पट्ठाविओ विएसे, भविही तोसे व रोसे मे ॥ ४८३० ॥ घडिया मित्तं पि जुगं व जीए हुंतं मए विउत्तम्मि । सा कह धरिही पाणे, इण्हि चिरविरहविहुरंगी ॥ ४८३१ ॥ जेसिमविउत्तनियपियपेम्मपसत्ताण जाइ जम्मो वि । ते च्चिय जिवंतु न वयं, विओइणो जे परायत्ता ॥ ४८३२ ॥ एवं वियप्पिही सा विओएण जह मह महासिणेहस्स ।। तह लज्जियं न कहिया जह जं तेणावि वत्ता वि ॥ ४८३३ ॥ जो पवसंतो वि हु वल्लहस्स वत्तं पि साहए न नियं । दूरे समागमो से कत्तो तइंसणाऽऽसा वि ॥ ४८३४ ॥ तमिमं भवस्सरूवं वल्लहजोगो विओयअंतो जं । तं मह दूरंतमसुहं जमहं इंतो न से मिलिओ ॥ ४८३५ ॥ संपइ तज्जाणावणसमस्सुओ वि हु तरामि नो गंतुं । जमगाहं जलहिजलं वाहाहिं न तीरए तरिउं ॥ ४८३६ ॥ अहवा का चिंताए, नत्थि धुवं भाविभवविलासस्स । तासो ता दढहियओ होउं सव्वं पि हु सहेमि ॥ ४८३७ ॥ इय परिभावण उव्विग्गमाणसो माणसो य साम-मुहो । गुरुजलजाणजवेणं जलनिहिमज्झं समणुपत्तो ॥ ४८३८ ॥
Jain Education International
For Private & Personal Use Only
www.jainelibrary.org
