________________
३७६
सिरिअणंतजिणचरियं
आगंतूण पियाए, पयासियं पुत्तपवहणारुहणं । तो से तोसो जाओ, अहो महेलाण निठुरया ॥ ४८१३ ॥ कहिओ सुयप्पवासो, न तेहिं बहुयाए तयणुरयणीए । दइयमपेच्छंती सा सवियक्का चिंतिउं लग्गा ॥ ४८१४ ॥ किं अज्ज अज्जउत्तो न दीसए जो सयासि अविउत्तो । नवरं कम्मि वि कज्जम्मि पेसिओ होहिही पिउणा ॥ ४८१५ ।। जणओ तणएण न चेव किं पि कज्जं कयाइ कारिंतो । ववहारा एस करो, जमत्थि वणिउत्तविसरो से ॥ ४८१६ ॥ जेण सह मह विओगो न मुहुत्तं पि हु कयाइ संजाओ । तेण विणा वोलीणो, दिवसो रयणी वि परिगलइ ॥ ४८१७ ॥ पुच्छामि कस्स पासे, पियप्पउत्तिं समुस्सुयमणा वि । जेण गुरूण सयासे पइपुच्छं वारए लज्जा ॥ ४८१८ ॥ कल्लम्मि दाहिणच्छि-फुरणेण विचिंतियं जमासि दुहं ।। तमिमं चिय संपत्तं, वल्लह विरहुब्भवं मन्ने || ४८१९ ॥ एस च्चिय सा रयणी, दइएण समं खणं च जा जंती । इण्हि पियविरहम्मि कियंत अहियव्व न विहाइ ।। ४८२० ॥ इय पियविओयचिंता, जरभरजज्जरसरीरलइया सा । अच्चंतदुब्बलत्तं पत्ता अइवाहइ दिणाइं ॥ ४८२१ ॥ पत्तो य जलपडंतारित्तप्पयारेण भुयगणेणेव । तरमाणं जलजाणं जाई जवेणं जलहि-सलिले ॥ ४८२२ ॥ तव्वेयवियं भणउ, दुहा विहट्टतदूरसलिलभरो । मग्गं व देइ जलही, अरित्त-भर-घाय-भीओ व्व ॥ ४८२३ ॥ पवणमणनयणवेगेण जाइ गरुयं पि पवहणं सलिले । विहिय-जड-संगमो लहइ, नूण गरुओ वि लहुयत्तं ॥ ४८२४ ॥ गुरुपवहणवेगावडणभयवसा जलयरा पणस्संति । सत्तीए संतीए कोवाणत्थं समल्लियइ ? || ४८२५ ॥
Jain Education International
For Private & Personal Use Only
www.jainelibrary.org
