________________
३७५
तवोवरिचंदकंतकहा अत्तव्ववएसेणं पउणं कारवइ पवहणं सेट्ठी । गोवेयव्वो अप्पाकज्जे छन्नम्मि करणिज्जो ॥ ४८०० ॥ गणिमं धरिमं मेयं पारिच्छिज्जं च गिण्हइ धणं सो । जेणप्पओयणं तं मोत्तुं गिण्हिज्जइ किमन्नं ? || ४८०१ ॥ वाहरिय सुओ बहुया, सयासओ जंपिओ चलसु वच्छ ! । जामो पयोयणेणं तो सो जणएण सह चलिओ ॥ ४८०२ ॥ दोन्नि वि जंता पत्ता, रयणायरनीरतीरदेसम्मि । पिच्छंति य उल्लसिरं अदिट्ठपारं नईनाहं ॥ ४८०३ । सामलसलिलभरम्मिं फेणलवा जम्मि परिविरायंति । नवनीलमणिसिला कुट्टिमम्मि मुत्ताहलभर व्व ॥ ४८०४ ॥ सामलचम्मकडतुच्छगम्मि वराडय व्व वित्थरिया । विगयब्भयगयणंगणगब्भे विप्फुरिय तार व्व ॥ ४८०५ ॥ मसिणियमयमयपंकोवलित्तभूमीए चंदण-छड व्व । आरामच्छायाए पडिया कुसुमोवहार व्व ॥ ४८०६ ॥ (कुलयं) पवहणगणमज्झट्ठियकूवयखंभा जलम्मि सतरंगे । संकेता दिति भयं, सलवलिरा सलिल-सप्प व्व ॥ ४८०७ ॥ तत्थारित्तयजुत्तं, वेरियणविवज्जियं पि जल-जालं । पेच्छंति जडाविद्धं, बहुधा वरपरिगयं पि हु ते ॥ ४८०८ ॥ . अनिलचलद्धयरणझणिरकिंकिणीगणविरायमाणम्मि । आरोविडं सुओ तम्मि पवहणे सेट्ठिणा भणिओ || ४८०९ ॥ वच्छा ! गच्छेज्ज अतुच्छलच्छिविच्छड्डमज्जिऊण लहुं । थोवदिणाणं मज्झे, दीवंतरविहियववहारो ॥ ४८१० ॥ गंतुमणिच्छंतो वि हु, जणयाणाभंग-भीरुओ भणइ । आएसो त्ति कुलीणो, कुणइ अकामो वि गुरु-वयणं ॥ ४८११ ॥ पेराविय जलजाणं, लग्गो सेट्ठी झड त्ति गिह-मग्गे । गमणमणीहंतो मा एसो वलओ त्ति कलिउं व ॥ ४८१२ ॥
Jain Education International
For Private & Personal Use Only
www.jainelibrary.org
