________________
३७४
सिरिअणंतजिणचरियं
इय चिंतिय पयरिक्के तीए एवं पयंपिओ सेट्ठी । किं अज्जउत्त ! जुत्तं तुह जमुवेक्खसि नियपुत्तं ? ॥ ४७८७ ॥ तरुणत्तणम्मि पत्ते, जो न मुणइ धणसमज्जणोवायं । वूढत्ते नित्थरिही कहं, तयज्जणविहीणो सो ॥ ४७८८ ॥ खज्जंती परिवद्धइ, पास च्चिय खिज्जए उ वणरिद्धी । वियसइ सेविज्जती, रयस्सिरी छिज्जई य तणू ॥ ४७८९ ॥ पालिस्संति कहम्मा-पिऊण वूढा णिबुद्धिया पुत्ता । जे अमुणियदविणज्जणकलाकलावा महामुक्खा ॥ ४७९० ॥ सो निच्छएण पच्छन्नवेरिओ पुत्तयाण जणओ वि । आबालकालओ वि हु, जो ताण न देइ हियसिक्खं ॥ ४७९१ ॥ वित्थारिज्जइ कित्ती, पिउणो पुत्तेण पसरियकलेण । जलपद्धइ व्व दूरं. चंदेण तरंगिणीवइणो ॥ ४७९२ ।। ते च्चिय पसंसणिज्जा, जाणसु या नियभुयज्जियधणेण । विहलजणब्भुद्धरणं, कुणंति पहरिसवियासिमुहा ॥ ४७९३ ॥ गुणवंता निवईहिं वि, सिरे धरिज्जति आयवत्तं व । निहिउं गिहचिंताए, ता पुत्तं कुणसु गुणवंतं ॥ ४७९४ ॥ नवरं इहट्ठिओ सो, बहुया वसओ न चेव ववहरिही । कज्जंतरप्पवित्ती कत्तो कंताहियहियाणं ? ॥ ४७९५ ॥ ता जलनिहिजत्ताए तहा पेससु मुणइं जह न तं बहुया । जं तीए समं पत्तो, तत्थ वि सो नेव ववहरिही ॥ ४७९६ ॥ पिय ! तुह हियमुवइठं, तं कुणसु तुमं मणोमयं जमिह । अणुजीवीहिं विणस्सर पहु ! कज्जमुवेहणिज्जं किं ? ॥ ४७९७ ॥ तह तीए सो पउत्तो तेण जहा मन्नियं तह त्ति तयं । इत्थीयणप्पवंचो, अगोयरो अमरगुरुणो वि ॥ ४७९८ ॥ बहुया विरोहिणीएऽभिमन्निओ तीए सुयविओगो वि । अहव न पायं महिलाणमत्थि निक्कित्तिमो नेहो || ४७९९ ॥
Jain Education International
For Private & Personal Use Only
www.jainelibrary.org
