________________
३७१
तवोवरिचंदकंतकहा सुगयपियामहसहसकरईसराणंतअच्चुयकइंदा । देव व्व जीए निवसंति, माणवामाणगुणगरुया ॥ ४७४८ ॥ जीए समुतुंग-जिणिंद-मंदिर-स्सिहर-खलणजीउ व्व । गच्छंतो गयणयले, लहइ ससंको जह च्छन्नं ॥ ४७४९ ॥ पउरगओ वि अरोगो, राया सूरो वि पालइ पुरंतिं । चंदावयंसओ नाम, चंदजोण्हा जसप्पसरो ॥ ४७५० ॥ विप्फुरियचंदहासोवसोहिओ रावणो व्व जो सहइ । समुदयमहियपरोहो सूरो व्व हरो व्व सुकुमारो ॥ ४७५१ ॥ दूएहिं पिव निम्मलगुणेहिं सियवन्नविलसमाणेहिं । अविक्खिया नरिंदा, पयपउमं जस्स सेवंति ॥ ४७५२ ॥ सेहाहियत्थसत्था विलसंतपयाय पाउससिरि व्व । आणंदइ तस्स मणं, कंता नामेण चंदमई ॥ ४७५३ ॥ सुहसारा सस्सोहा सुरयणसंचेयणा पवालहया । सव्वत्थ दुहा नेया, जासु पयासियनया य तहा || ४७५४ ॥ नवनेहनिब्भराए तीए समं निवइणो विणोएहिं । विविहेहिं जाइ कालो, अन्नाओ इव सुहुक्करिसा || ४७५५ ॥ नयरीए तीए निवसइ, नरिंदसम्माणपत्तमाहप्पो । सारयछणचंदजसो चंदजसो नाम पुरसेट्ठी ॥ ४७५६ ॥ रंगो नीइनडीणं मलओ निम्मलकलालिकलियाणं । तरणीगुणकिरणाणं, मयरहरो मुत्ति सुत्तीणं ॥ ४७५७ ॥ नहपहसमस्सिया से, समत्थि चंदस्सिरि व्व चंदसिरी । पमया सिया पवित्ता, कंता कुवलयकयाणंदा ॥ ४७५८ ॥ तिवलीतरंगघणहररहंगसिंगारसारपयपवहा । मुहकमललवलच्छिब्भमरभामिया सहइ सरिय व्व ॥ ४७५९ ॥ नामेण चंदकंतो, पुत्तो ताणत्थि चंदकंतो व्व । गुरुरायपायसंगमपव्वत्तआणंदअंसुजलो ॥ ४७६० ॥
Jain Education International
For Private & Personal Use Only
www.jainelibrary.org
