________________
३६७
सीलोवरिरयणावलीकहा उज्जाणपालपुरिसा, जाणिउं गुरुसमागमं राया । गुरुभत्तिरायसंजायरम्मरोमंचकंचुईओ ॥ ४६९७ ॥ सिंगारसुंदरंगो, गंधगयकंधरं समारूढो । सियछत्तचारुचमराइरायलंकारकमणीओ ॥ ४६९८ ॥ कुमरंतेउर-सामंत-मंति-मंडलियरईयपरिवारो । पत्तो हंसविलासे उज्जाणे गुरुविभूईए ॥ ४६९९ ॥ उत्तरियकरिंदाओ, चत्तछत्ताइं पंचनिवचिंधो । दाउं पयाहिणतिगं, वंदइ गुरुपायसयवत्तं ॥ ४७०० ॥ कुमररयणावलीए, सह परियणेणावि वंदिउं भयवं । संपत्तधम्मलाहा सव्वे वि सट्ठाणमुवविट्ठा ॥ ४७०१ ॥ . सद्धम्मस्सवणुज्जयसहाए सद्धम्मदेसणा पहुणा ।। पारद्धा पारभवंतकारिणी सिद्धिसंजणणी ॥ ४७०२ ॥ भो भो भव्वा ! सव्वायरेण उज्जमह सव्वविरईए । अक्खेवेण वि मोक्खो जायइ जीए सयासाओ ॥ ४७०३ ॥ तीए सुहुमाण सबायराण जीवाण रक्खणं कज्जं । सुहुमं च बायरं वा वज्जेयव्वं मुसावयणं ॥ ४७०४ ॥ सुहुमं च बायरं वा वत्थुमदिन्नं सया चए पुव्वं ।। इत्थीण परिच्चाओ जावज्जीवं विहियव्वो || ४७०५ ॥ थूलो वा सुहुमो वा परिग्गहो नो सया धरेयव्वो । . रयणी-भोयणचाओ जावज्जीवं पि कायव्वो ॥ ४७०६ ॥ एवं महव्वयाई निसिभोयणचायकरणसहियाइं । सव्वविरईए सम्मं, परिपालिज्जंति एयाइं ॥ ४७०७ ॥ एक्का वि सव्वविरई, भूरिब्भवभवाइं हरइ पावाइं । विप्फुरिया सूरपहा, दिसिचक्कं भवाई व तमाई ॥ ४७०८ ॥ उवभुत्ता रज्जसिरी सुइरं सव्वुत्तमो सुओ जाओ । राय ! किमिहि खूणं जं नज्ज वि कुणसि पव्वज्जं ? || ४७०९ ॥
Jain Education International
For Private & Personal Use Only
www.jainelibrary.org
